అర్జెంటీనా తీరంలో 23 కి.మీ. వెనక్కి వెళ్లిన సముద్రం.. అసలు కారణం ఇదే!

అర్జెంటీనాలోని బ్యూనస్‌ ఎయిర్స్‌ ప్రావిన్స్‌లో ఉన్న మార్‌ డెల్‌ ప్లాటా తీరంలో సముద్రం భారీగా వెనక్కి వెళ్లిన దృశ్యాలు సోషల్‌ మీడియాలో వైరల్‌గా మారాయి. సుమారు 23 కిలోమీటర్ల మేర నీరు వెనక్కి వెళ్లినట్లు ప్రచారం జరగడంతో.. సముద్రం ఎండిపోతోందని, ఇది ప్రకృతి విపత్తుకు సంకేతమని పలువురు ఆందోళన వ్యక్తం చేశారు. నీరు తగ్గిపోవడంతో సాధారణంగా సముద్రంలో కనిపించని రాతి నిర్మాణాలు, సముద్రపు నేలపై ఉన్న పడవలు బయటకు కనిపించాయి. కొన్ని చేపలు కూడా మృతి చెందిన దృశ్యాలు వీడియోల్లో కనిపించాయి.

అయితే ఈ ఘటనపై వచ్చిన ప్రచారంలో వాస్తవం లేదని నిపుణులు స్పష్టం చేశారు. సముద్రం శాశ్వతంగా వెనక్కి వెళ్లిపోవడం లేదా పూర్తిగా ఎండిపోవడం జరగలేదని తెలిపారు. తీర ప్రాంతాల్లో అప్పుడప్పుడు చోటుచేసుకునే ఆటుపోట్ల మార్పులు, బలమైన గాలుల ప్రభావం కారణంగా కొంతకాలం పాటు నీటిమట్టం అసాధారణంగా తగ్గే అవకాశం ఉందని వివరించారు.

నిరంతరంగా వీచే బలమైన గాలులు సముద్రపు నీటిని తీరం నుంచి దూరంగా నెట్టడంతో విండ్‌ సెట్‌డౌన్‌‌గా పిలిచే పరిస్థితి ఏర్పడవచ్చు. దీనికి ఆటుపోట్ల సహజ చక్రం కూడా తోడైతే తీర ప్రాంతంలో నీటిమట్టం ఒక్కసారిగా చాలా తక్కువగా కనిపించవచ్చు. ఫలితంగా సాధారణంగా నీటిలో మునిగివుండే రాళ్లు, సముద్రపు అడుగు భాగాలు, పడవలు బయటకు కనిపిస్తాయి.

ఇలాంటి దృశ్యాలను చూసి సునామీకి ముందు సముద్రం వెనక్కి వెళ్లే ఘటనతో పోల్చడం కూడా సరికాదని నిపుణులు చెబుతున్నారు. సముద్ర గర్భంలో భూకంపం వంటి భారీ భౌగోళిక పరిణామాల వల్ల సునామీ ఏర్పడితే.. నీరు వెనక్కి వెళ్లిన అనంతరం భారీ అలలు తీరాన్ని తాకే ప్రమాదం ఉంటుంది. అయితే అర్జెంటీనాలో కనిపించిన ఘటనలో కొన్ని గంటల్లోనే నీటిమట్టం తిరిగి సాధారణ స్థితికి చేరుకోవడం.. ఇది సాధారణ సహజ ప్రక్రియేనని స్పష్టం చేస్తోంది.

అందువల్ల “అర్జెంటీనాలో సముద్రం ఎండిపోయింది”, “కొత్త దీవి ఏర్పడింది”, “ఇది భారీ ప్రకృతి విపత్తుకు సంకేతం” అంటూ సోషల్‌ మీడియాలో జరుగుతున్న ప్రచారాన్ని నమ్మాల్సిన అవసరం లేదని నిపుణులు సూచిస్తున్నారు.