విద్యుత్‌ సౌధ వద్ద ఉద్యోగుల మహాధర్నా

తెలంగాణ విద్యుత్‌ సంస్థల్లో పనిచేస్తున్న ఉద్యోగులు, ఆర్టిజన్లు, పెన్షనర్ల సమస్యలను వెంటనే పరిష్కరించాలని విద్యుత్‌ ఉద్యోగ సంఘాల ఐకాస డిమాండ్‌ చేసింది. తమ సమస్యలపై పలుమార్లు అధికారులకు వినతులు అందజేసినా తగిన స్పందన లేకపోవడంతో ‘చలో విద్యుత్తు సౌధ’ కార్యక్రమాన్ని నిర్వహించినట్లు ఐకాస నేతలు తెలిపారు. రాష్ట్రంలోని వివిధ ప్రాంతాల నుంచి భారీగా తరలివచ్చిన ఉద్యోగులు, ఆర్టిజన్లు విద్యుత్‌ సౌధ వద్ద ప్లకార్డులు ప్రదర్శిస్తూ నినాదాలు చేశారు.

ఉద్యోగుల సమస్యలపై ప్రభుత్వం, విద్యుత్‌ సంస్థల యాజమాన్యాలు ప్రత్యేకంగా సమావేశాలు నిర్వహించి పరిష్కార మార్గం చూపాలని నేతలు కోరారు. ప్రధానంగా వేతన సవరణ కమిటీని తక్షణమే ఏర్పాటు చేయాలని డిమాండ్‌ చేశారు. సిబ్బంది కొరత కారణంగా ప్రస్తుతం పనిచేస్తున్న ఉద్యోగులపై అదనపు భారం పడుతోందని, ఖాళీగా ఉన్న పోస్టులను వెంటనే భర్తీ చేయాలని కోరారు.

ఆర్టిజన్లకు క్యాడర్‌ నిర్ణయించడంతో పాటు సీనియారిటీ, ప్రమోషన్లు, ఇతర సర్వీసు ప్రయోజనాలు కల్పించాలని ఐకాస నేతలు పేర్కొన్నారు. 1999 నుంచి 2004 మధ్య కాలంలో నియమితులైన ఉద్యోగులకు జీపీఎఫ్‌, పెన్షన్‌ సదుపాయాలు కల్పించాలని డిమాండ్‌ చేశారు. అలాగే యాదాద్రి థర్మల్‌ పవర్‌ స్టేషన్‌లో కోల్‌, యాష్‌ హ్యాండ్లింగ్‌ పనులకు సంబంధించి ఇచ్చిన టెండర్లను ఉపసంహరించుకోవాలని కోరారు.

కీలక విభాగాల్లో పొరుగుసేవల ఉద్యోగులను నియమించడం వల్ల విద్యుత్‌ ప్లాంట్ల భద్రత, నిర్వహణ, దీర్ఘకాలిక పనితీరుపై ప్రభావం పడే అవకాశం ఉందని నేతలు ఆందోళన వ్యక్తం చేశారు. ఈ అంశాలన్నింటిపై యాజమాన్యం వెంటనే చర్చలు జరిపి పరిష్కారం చూపాలని కోరారు.

ఉద్యోగులు, ఆర్టిజన్లు, పెన్షనర్లకు సంబంధించిన మొత్తం 14 డిమాండ్లను ఈ నెల 26లోగా పరిష్కరించాలని ఐకాస గడువు విధించింది. నిర్దేశిత గడువులోగా సమస్యలకు పరిష్కారం చూపకపోతే ఈ నెల 27 నుంచి రాష్ట్రంలోని అన్ని జిల్లాల్లో రిలే నిరాహారదీక్షలు చేపడతామని నాయకులు హెచ్చరించారు. దీంతో విద్యుత్‌ ఉద్యోగుల ఆందోళన తదుపరి దశకు చేరే అవకాశం ఉంది.