‘టాక్సిక్‌’కు ‘ఏ’ సర్టిఫికెట్‌.. ఒక్క కట్‌ కూడా చెప్పని సెన్సార్‌!

యశ్‌ కథానాయకుడిగా గీతూ మోహన్‌దాస్‌ దర్శకత్వంలో తెరకెక్కిన భారీ యాక్షన్‌ చిత్రం ‘టాక్సిక్‌’ విడుదలకు సిద్ధమవుతోంది. ఈ సినిమా సెన్సార్‌ ప్రక్రియ పూర్తయినట్లు తెలుస్తోంది. సోషల్‌ మీడియాలో వైరల్‌ అవుతున్న సెన్సార్‌ రిపోర్ట్‌ ప్రకారం.. సెంట్రల్‌ బోర్డ్‌ ఆఫ్‌ ఫిల్మ్‌ సర్టిఫికేషన్‌ (CBFC) ఈ చిత్రానికి ‘ఏ’ సర్టిఫికెట్‌ జారీ చేసింది. ప్రత్యేకంగా ఎలాంటి సన్నివేశాలను తొలగించాలంటూ బోర్డు సూచించలేదని సమాచారం.

కన్నడ, ఇంగ్లిష్‌ భాషల్లో తెరకెక్కిన ఈ సినిమా మొత్తం నిడివి 3 గంటల 12 నిమిషాలుగా ఉన్నట్లు తెలుస్తోంది. కన్నడ వెర్షన్‌లో రెండు పదాలను మ్యూట్‌ చేయడంతో పాటు.. పొగతాగడం, మద్యపానానికి సంబంధించిన సన్నివేశాల సమయంలో తప్పనిసరిగా హెచ్చరిక లైన్‌ను ప్రదర్శించాలని సెన్సార్‌ బోర్డు సూచించినట్లు సమాచారం.

‘టాక్సిక్‌’ను భారీ యాక్షన్‌, రివేంజ్‌ డ్రామాగా రూపొందించారు. సినిమాలో హింసాత్మక సన్నివేశాలు ఎక్కువగా ఉన్నాయని ఇప్పటికే విడుదలైన ప్రచార చిత్రాలు, టీజర్‌, ఇతర ప్రమోషనల్‌ కంటెంట్‌ ద్వారా స్పష్టమైంది. ఇలాంటి నేపథ్యంలో సెన్సార్‌ బోర్డు ఒక్క సన్నివేశాన్ని కూడా తొలగించకుండా ‘ఏ’ సర్టిఫికెట్‌ ఇవ్వడం ఇప్పుడు సినీ వర్గాల్లో చర్చనీయాంశంగా మారింది.

సాధారణంగా హింస, అభ్యంతరకర భాష, మాదకద్రవ్యాలు, పొగతాగడం, మద్యపానం వంటి అంశాలున్న సన్నివేశాలను సెన్సార్‌ బోర్డు పరిశీలిస్తుంది. అయితే ‘టాక్సిక్‌’ విషయంలో రెండు పదాలను మ్యూట్‌ చేయడం, పొగతాగడం, మద్యపాన సన్నివేశాలకు హెచ్చరికలు జోడించడం మినహా పెద్దగా మార్పులు సూచించలేదని వైరల్‌ అవుతున్న రిపోర్ట్‌ చెబుతోంది.

‘టాక్సిక్‌’కు కట్స్‌ లేకుండా ‘ఏ’ సర్టిఫికెట్‌ రావడంపై సోషల్‌ మీడియాలో భిన్నమైన అభిప్రాయాలు వ్యక్తమవుతున్నాయి. కొన్ని హాలీవుడ్‌ చిత్రాల్లో ముద్దు సన్నివేశాలు, ఇతర అభ్యంతరకర అంశాల విషయంలో ఆంక్షలు విధించే సెన్సార్‌ బోర్డు.. అత్యంత హింసాత్మకంగా కనిపిస్తున్న ‘టాక్సిక్‌’కు ఎలాంటి కట్స్‌ సూచించకపోవడంపై కొందరు నెటిజన్లు ప్రశ్నలు సంధిస్తున్నారు.

అయితే ‘ఏ’ సర్టిఫికెట్‌ అంటే సినిమా కంటెంట్‌ పెద్దలకు మాత్రమే ఉద్దేశించబడిందని అర్థం. అందువల్ల హింసాత్మక కంటెంట్‌ ఉన్నప్పటికీ, దానికి తగ్గ వయోపరిమితితో సినిమా విడుదలకు అనుమతి ఇవ్వడం సాధ్యమేనని మరో వర్గం పేర్కొంటోంది.

‘టాక్సిక్‌’ గురించి యశ్‌ గతంలో మాట్లాడుతూ.. ఈ చిత్రం పెద్దలను దృష్టిలో పెట్టుకుని రూపొందించినదేనని స్పష్టం చేశారు. సినిమాలోని కథ, పాత్రలు, భావోద్వేగాలు ప్రేక్షకులను ఆలోచింపజేస్తాయని ఆయన పేర్కొన్నారు. దర్శకురాలు గీతూ మోహన్‌దాస్‌ ఈ కథను ఎంతో నిజాయతీగా తెరకెక్కించారని యశ్‌ చెప్పిన విషయం తెలిసిందే.

ఈ భారీ బడ్జెట్‌ చిత్రంలో యశ్‌తో పాటు నయనతార, కియారా అద్వానీ, హుమా ఖురేషీ, రుక్మిణి వసంత్‌, తారా సుతారియా కీలక పాత్రల్లో నటించారు. యాక్షన్‌, రివేంజ్‌, క్రైమ్‌ అంశాల చుట్టూ సాగే కథతో ఈ సినిమా రూపొందినట్లు తెలుస్తోంది.

ఇక ‘టాక్సిక్‌’ ఆగస్టు 26న ప్రపంచవ్యాప్తంగా థియేటర్లలో విడుదల కానుంది. యశ్‌ అభిమానులతో పాటు భారీ యాక్షన్‌ చిత్రాలను ఇష్టపడే ప్రేక్షకుల్లో ఈ సినిమాపై ఇప్పటికే భారీ అంచనాలు ఉన్నాయి. సెన్సార్‌ నుంచి ‘ఏ’ సర్టిఫికెట్‌ రావడంతో విడుదలకు ముందు సినిమాపై ఆసక్తి మరింత పెరిగింది.