ఈనాడు, హైదరాబాద్: రాష్ట్రంలో గ్రామీణ స్థానిక సంస్థల ఎన్నికల నిర్వహణకు సంబంధించిన గత నెల 29న జారీ చేసిన నోటిఫికేషన్లను తక్షణమే నిలిపివేస్తున్నట్లు రాష్ట్ర ఎన్నికల సంఘం ప్రకటించింది. తదుపరి నోటిఫికేషన్ జారీ అయ్యే వరకు ఎన్నికల ప్రక్రియ నిలిపివేయాలని గురువారం రాత్రి ఉత్తర్వులు జారీ చేశారు. ఈ నిర్ణయం రాష్ట్ర హైకోర్టు మధ్యంతర ఉత్తర్వుల మేరకు తీసుకున్నట్లు వెల్లడించారు.
జడ్పీటీసీ, ఎంపీటీసీ, సర్పంచి, వార్డు సభ్యుల ఎన్నికల నిర్వహణ, ప్రవర్తన నియమావళి (కోడ్), ఇతర అన్ని ప్రక్రియలు సెప్టెంబర్ 29న ఉదయం జారీ చేసిన నోటిఫికేషన్ ప్రకారం కొనసాగుతున్నప్పటికీ, హైకోర్టు ఉత్తర్వుల మేరకు అన్ని చర్యలను నిలిపివేసినట్టు వెల్లడించారు. దీనిలో నామినేషన్ల స్వీకరణ ప్రక్రియ, ఎన్నికల ప్రవర్తన నియమావళి అమలూ నిలిపివేయబడ్డాయని స్పష్టం చేశారు.
పలు జిల్లాల్లో దాఖలైన నామినేషన్లు:
ప్రారంభ షెడ్యూల్ ప్రకారం, రిటర్నింగ్ అధికారులు ఎంపీటీసీ, జడ్పీటీసీ స్థానాల మొదటి దశ ఎన్నికల కోసం గురువారం ఉదయం 10 గంటలకు నోటిఫికేషన్లు జారీ చేశారు. దీనికి అనుగుణంగా 2,963 ఎంపీటీసీ, 292 జడ్పీటీసీ స్థానాలకు నామినేషన్లు స్వీకరించబడ్డాయి. సాయంత్రానికి హైకోర్టు స్టే ఉత్తర్వులు వెలువడడంతో వెంటనే ఎన్నికల సంఘం సమావేశమై, అడ్వొకేట్ జనరల్ సలహా మేరకు నోటిఫికేషన్లను నిలిపివేసింది.
ఎక్కడెక్కడ ఎన్ని నామినేషన్లు:
గురువారం ఉదయం, జడ్పీటీసీ ఎన్నికలకు 9 జిల్లాల నుంచి 16 నామినేషన్లు, ఎంపీటీసీ స్థానాలకు 28 జిల్లాల నుంచి 103 నామినేషన్లు దాఖలయ్యాయి.
- జడ్పీటీసీ: సిద్దిపేటలో అత్యధికంగా 7 నామినేషన్లు, రాజన్న సిరిసిల్లలో 2, నిజామాబాద్, వరంగల్, హనుమకొండ, కరీంనగర్, కుమురంభీం ఆసిఫాబాద్, మహబూబాబాద్, సంగారెడ్డి జిల్లాల్లో ఒక్కొక్కటి చొప్పున, మిగిలిన 22 జిల్లాల్లో ఒక్కటి కూడా దాఖలు కాలేదు.
- ఎంపీటీసీ: భద్రాద్రి కొత్తగూడెం జిల్లాలో 17, యాదాద్రి భువనగిరి 11, కుమురంభీం ఆసిఫాబాద్ 9, నిజామాబాద్, రంగారెడ్డి 8, ఖమ్మం, నారాయణపేట, నిర్మల్, మహబూబాబాద్ 5, నాగర్కర్నూల్, సిద్దిపేట, వనపర్తి 3, వరంగల్, జగిత్యాల, కామారెడ్డి, కరీంనగర్, నల్గొండ 2, ఆదిలాబాద్, హనుమకొండ, జయశంకర్ భూపాలపల్లి, గద్వాల, మహబూబ్నగర్, మంచిర్యాల, ములుగు, పెద్దపల్లి, రాజన్న సిరిసిల్ల, సంగారెడ్డి, వికారాబాద్ ఒక్కొక్కటి, మెదక్, జనగామ, సూర్యాపేట జిల్లాల్లో ఒక్కరు కూడా వేయలేదు.
అధికారుల ప్రకారం, ఎన్నికల ప్రక్రియ మళ్లీ మొదలైనప్పుడు ఈ నామినేషన్లు చెల్లుబాటు అవుతాయి. ఒకవేళ రిజర్వేషన్లు మారితే, సంబంధిత అభ్యర్థుల డిపాజిట్ రుసుము తిరిగి ఇవ్వబడుతుంది.
