తెలంగాణ రాష్ట్ర ఏర్పాటులో ప్రొఫెసర్ కోదండరామ్ గారి పాత్ర చరిత్రలో చెరగని ముద్రగా నిలుస్తుందని టీపీసీసీ అధ్యక్షుడు మహేష్ కుమార్ గౌడ్ పేర్కొన్నారు. నిజాయితీ, నిస్వార్థతతో ఆయన తెలంగాణ ఉద్యమానికి చేసిన సేవలను మరువలేమని తెలిపారు.
బుధవారం నాడు హైదరాబాద్లోని తెలంగాణ జన సమితి (టీజేఎస్) కార్యాలయంలో మహేష్ కుమార్ గౌడ్, కోదండరామ్ను కలుసుకున్నారు. ఈ సందర్భంగా జూబ్లీహిల్స్ ఉపఎన్నికలో కాంగ్రెస్ అభ్యర్థి నవీన్ యాదవ్ కు మద్దతు ఇవ్వాలని కోరారు. నవీన్ యాదవ్ను భారీ మెజారిటీతో గెలిపించాలని విజ్ఞప్తి చేశారు. టీజేఎస్ మద్దతుతో పాటు సీపీఐ, సీపీఎం, ఏఐఎంఎం వంటి మిత్రపక్షాల మద్దతును కూడా కోరినట్లు తెలిపారు.
కోదండరామ్ సహకారం మరువలేనిది
“తెలంగాణ ఉద్యమ సమయంలో కోదండరామ్ గారి నాయకత్వం కీలకంగా నిలిచింది. రాష్ట్ర సాధన తర్వాత ఉద్యోగ నియామక విధానాల రూపకల్పనలో ఆయన ఇచ్చిన సలహాలు, సూచనలు ఎంతో విలువైనవిగా ఉండాయి. ప్రజల ఆకాంక్షలకు అనుగుణంగా కాంగ్రెస్ ప్రభుత్వం పాలన సాగిస్తోంది,” అని మహేష్ కుమార్ గౌడ్ వివరించారు.
బీఆర్ఎస్, బీజేపీపై విమర్శలు
“పదేళ్ల బీఆర్ఎస్ పాలన ఎలా గాడి తప్పిందో ప్రజలకు బాగా తెలుసు. వారి నిరంకుశ పాలన నుంచి విముక్తి కోసం మేమంతా 2023లో కలసి పోరాడాం. కాంగ్రెస్ అధికారంలోకి రావడంలో మిత్రపక్షాల సహకారం ఉన్నది. మేము ఇచ్చిన మాటను నిలబెట్టుకుంటాం,” అని స్పష్టం చేశారు.
బీజేపీపై విమర్శలు చేస్తూ, కేంద్ర మంత్రి స్థాయిలో ఉన్న బండి సంజయ్ సంచలన వ్యాఖ్యలపై ఆయన ఆగ్రహం వ్యక్తం చేశారు. “తనకు మాట్లాడుతున్న దాని అర్థం తెలుస్తుందా? మత విద్వేషాలు రెచ్చగొట్టి, ప్రజల సెంటిమెంట్తో ఆడుకోవాలనేది బీజేపీ పన్నాగం,” అని మండిపడ్డారు. జూబ్లీహిల్స్ ఉపఎన్నికల్లో మతవాద శక్తులకు తగిన బుద్ధి చెప్పాల్సిన అవసరం ఉందన్నారు.
మిత్రపక్షాలతో బంధం కొనసాగుతూనే ఉంటుంది
టీపీసీసీ మిత్రపక్షాల పట్ల నిబద్ధత కలిగి ఉందని, ఇచ్చిన మాటను నిలబెట్టుకుంటామని మహేష్ కుమార్ గౌడ్ పునరుద్ఘాటించారు. రాష్ట్రానికి మంచి జరగాలంటే ప్రజాస్వామ్య భావనలతో కూడిన శక్తులే విజయం సాధించాలని, అందులో భాగంగా కాంగ్రెస్ పార్టీ పోరాడుతుందని చెప్పారు.
