మూడు దశాబ్దాల తర్వాత అమెరికా మళ్లీ అణ్వాయుధ పరీక్షలను ప్రారంభించాలని నిర్ణయించుకున్న అధ్యక్షుడు డొనాల్డ్ ట్రంప్ మరోసారి సంచలన వ్యాఖ్యలు చేశారు. ఈ నిర్ణయాన్ని సమర్థిస్తూ ఆయన ప్రపంచానికి కొత్త సందేశం ఇచ్చారు. సీబీఎస్ న్యూస్ ఇంటర్వ్యూలో మాట్లాడుతూ ట్రంప్ అన్నారు – “ప్రపంచంలోని అనేక దేశాలు ప్రస్తుతం అణ్వాయుధాలను పరీక్షిస్తున్నాయి. రష్యా, చైనా, ఉత్తరకొరియా, పాకిస్థాన్ లాంటి దేశాలు అణు పరీక్షలు జరుపుతున్నా, వాటి గురించి బహిరంగంగా మాట్లాడడం లేదు. కానీ మేము దాచిపెట్టం, ఏదైనా చేస్తే బహిరంగంగానే చేస్తాం,” అని చెప్పారు.
అమెరికా ఇంతవరకు ఇతర దేశాల అణు పరీక్షలపై స్పందించలేదని, అయితే ఇకపై నిశ్శబ్దంగా ఉండదని ట్రంప్ స్పష్టం చేశారు. “ఇతర దేశాల మాదిరిగా మేమూ అణ్వాయుధ పరీక్షలు నిర్వహించబోతున్నాం,” అని ఆయన అన్నారు.
రష్యా, చైనా వద్ద విపరీతమైన అణ్వాయుధ నిల్వలు ఉన్నాయని, అయితే అమెరికా వద్ద వాటికంటే ఎక్కువ ఉన్నాయని ట్రంప్ వెల్లడించారు. “మా వద్ద ఉన్న అణ్వాయుధాలతో ప్రపంచాన్ని 150 సార్లు పేల్చేయొచ్చు,” అని చెప్పి, అయితే అణ్వాయుధాల తగ్గింపు (disarmament)పై రష్యా అధ్యక్షుడు పుతిన్, చైనా అధ్యక్షుడు జిన్పింగ్తో చర్చించానని తెలిపారు.
అమెరికా అణు పరీక్షలకు ఏర్పాట్లు ఇప్పటికే ప్రారంభమయ్యాయని చెప్పారు కానీ, వాటి సమయం, ప్రదేశం వంటి వివరాలను మాత్రం వెల్లడించలేదు.
దీనికి ముందు దక్షిణ కొరియాలోని బుసాన్ పర్యటనకు ముందు ‘ట్రూత్ సోషల్’లో చేసిన పోస్టులో ట్రంప్ తెలిపారు: “అణ్వాయుధాల విధ్వంసకర శక్తిని దృష్టిలో ఉంచుకుని, నా గత పాలనలో పరీక్షలను నిలిపివేశాం. కానీ ఇప్పుడు పరిస్థితులు మారాయి. రష్యా, చైనా వేగంగా తమ అణు సామర్థ్యాలను పెంచుకుంటున్నాయి. వచ్చే ఐదేళ్లలో మూడు దేశాలు సమాన స్థాయికి చేరుకునే అవకాశం ఉంది. అందుకే అమెరికా మళ్లీ అణు పరీక్షలు ప్రారంభించాల్సిన అవసరం ఉంది. దీని కోసం డిపార్ట్మెంట్ ఆఫ్ వార్కు ఇప్పటికే ఆదేశాలు ఇచ్చాను,” అని ట్రంప్ స్పష్టం చేశారు.
