ఆస్ట్రేలియా, మెల్బోర్న్: ఆంధ్రప్రదేశ్ను 2047 నాటికి గ్లోబల్ ఎకనమిక్ పవర్ హౌస్గా మార్చే లక్ష్యంతో రాష్ట్ర ప్రభుత్వం వేగవంతమైన ప్రణాళికలను అమలు చేస్తోంది. రాష్ట్ర విద్య, ఐటీ, ఎలక్ట్రానిక్స్ శాఖ మంత్రి నారా లోకేష్ ఈ ఉద్దేశ్యాన్ని ఆస్ట్రేలియా ట్రేడ్ అండ్ ఇన్వెస్ట్మెంట్ కమిషన్ (Austrade) ఎగ్జిక్యూటివ్ల రౌండ్ టేబుల్ సమావేశంలో తెలిపారు.
లోకేష్ ప్రకారం, ముఖ్యమంత్రి చంద్రబాబునాయుడు నేతృత్వంలో ఆంధ్రప్రదేశ్ అభివృద్ధి దిశగా శరవేగంగా ముందుకు సాగుతోంది. గత 16 నెలల్లో $117 బిలియన్ డాలర్ల పెట్టుబడులు ఆకర్షించబడ్డాయి. ఏరోస్పేస్ & డిఫెన్స్, అగ్రిటెక్, ఫుడ్ ప్రాసెసింగ్, డీప్టెక్, ఎలక్ట్రానిక్స్, సెమీకండక్టర్లు, గ్రీన్ హైడ్రోజన్, లాజిస్టిక్స్, పోర్టులు, ఫార్మా, బయోటెక్నాలజీ, టూరిజం వంటి రంగాల్లో విశేష పెట్టుబడి అవకాశాలు ఉన్నాయని మంత్రి గుర్తించారు.
ఆంధ్రప్రదేశ్ అభివృద్ధికి మౌలిక స్తంభాలుగా బలమైన విధాన వ్యవస్థ, ప్రపంచ స్థాయి లాజిస్టిక్స్, మూడు ఆర్థిక కారిడార్లు, భవిష్యత్ సిద్ధమైన శ్రామిక శక్తి, క్వాంటం కంప్యూటింగ్, డీప్టెక్, గ్రీన్ ఎనర్జీ వ్యాలీ ఉన్నాయి. అధునాతన సాంకేతికత, ఏఐ ఆధారిత గవర్నెన్స్ రాష్ట్ర అభివృద్ధికి వేగం పెడతాయి. అభివృద్ధి లక్ష్యాల కోసం ఇండస్ట్రియల్ డెవలప్మెంట్ పాలసీ 4.0 మరియు 24 థీమెటిక్ పాలసీలను ప్రకటించాం. డ్రోన్లు, ఎలక్ట్రానిక్స్, సెమీకండక్టర్లపై ప్రత్యేక దృష్టి పెట్టాం.
1053 కి.మీ.ల సువిశాల తీరప్రాంతం కలిగిన రాష్ట్రంలో ప్రస్తుత ఆరు ఆపరేషనల్ పోర్టులు ప్రతి సంవత్సరం 193 మిలియన్ మెట్రిక్ టన్నుల సరుకు రవాణా చేస్తాయి. వచ్చే ఏడాదికల్లా 350 మిలియన్ మెట్రిక్ టన్నుల సామర్థ్యం గల మరో 4 గ్రీన్ఫీల్డ్ పోర్టులు ప్రారంభం కానున్నాయి. తూర్పు తీర సముద్ర కార్గో రవాణాలో 40% ఏపీ నుంచి సాగుతోంది. ప్రస్తుత $20 బిలియన్ల ఎగుమతులను 2047 నాటికి $450 బిలియన్కు పెంచే లక్ష్యంతో ప్రణాళికాబద్ధంగా ముందుకు సాగుతోంది.
విశాఖపట్నం ఐటీ, ఇన్నోవేషన్, డేటా హబ్గా అభివృద్ధి చెందుతోంది. గూగుల్ 15 బిలియన్ డాలర్ల పెట్టుబడితో ఏఐ హబ్ నిర్మించబోతోంది. ఆర్సెలర్ మిట్టల్ రూ.1.35 లక్షల కోట్లతో దేశంలో అతిపెద్ద స్టీల్ ప్లాంట్ ఏర్పాటు చేయబోతోంది. విశాఖ మహానగరం 2047 నాటికి ట్రిలియన్ డాలర్ల ఆర్థిక వ్యవస్థగా అభివృద్ధి చెందుతుంది.
అమరావతిలో జనవరి నుండి దక్షిణాసియాలోనే తొలి 156-క్యూబిట్ క్వాంటమ్ కంప్యూటర్ సేవలు ప్రారంభం కానున్నాయి. Quantum Valleyలో స్టేట్ డేటా లేక్, అవేర్ హబ్, ఇంటెలిజెన్స్ లేయర్, డిజిటల్ గవర్నెన్స్ లాంటి ఆధునిక సౌకర్యాలు ఉంటాయి. ప్రస్తుత $180 బిలియన్ డాలర్ల ఆర్థిక వ్యవస్థ 2047 నాటికి $2.4 ట్రిలియన్ డాలర్ల లక్ష్యాన్ని చేరేందుకు వేగవంతమైన ప్రణాళికాబద్ధంగా ముందుకు సాగుతోంది.
నవంబర్ 14-15 తేదీల్లో విశాఖపట్నంలో నిర్వహించబోయే పార్టనర్షిప్ సమ్మిట్–2025లో ఆస్ట్రేలియన్ పారిశ్రామికవేత్తలు పాల్గొని ఏపీలో పెట్టుబడుల అవకాశాలను ప్రత్యక్షంగా పరిశీలిస్తారు.
