అన్నమయ్య జిల్లా: గత కొద్ది రోజులుగా కురుస్తున్న భారీ వర్షాల ప్రభావంతో గుంజున ఏరు ఉప్పొంగి, పరిసర ప్రాంతాల్లో వరద నీరు వ్యాపించింది. రెడ్డివారిపల్లి సమీపంలోని రహదారి వరద ప్రవాహంలో కొట్టుకుపోవడంతో గ్రామస్తులు రాకపోకలకు తీవ్ర ఇబ్బందులు ఎదుర్కొంటున్నారు.
ప్రస్తుతం రోడ్డు పూర్తిగా తెగిపోవడంతో విద్యార్థులు, ఉద్యోగులు, రైతులు గ్రామం బయటకు వెళ్లే పరిస్థితి లేకుండా పోయింది. స్థానికులు మాట్లాడుతూ, “గత సంవత్సరం నుంచే బ్రిడ్జి నిర్మాణం మొదలైందిగానీ ఇంకా పూర్తి కాలేదు. అధికారులు వెంటనే స్పందించి బ్రిడ్జి పనులను వేగంగా పూర్తి చేయాలి” అని డిమాండ్ చేశారు.
వర్షాల కారణంగా ఇంకా నీటి మట్టం తగ్గకపోవడంతో, అధికారులు ఎరుపు హెచ్చరిక జారీ చేశారు. ప్రజలు అవసరమైతే తప్ప బయటకు రావొద్దని సూచించారు.
గ్రామస్తులు మాత్రం స్థిర పరిష్కారం కోసం బ్రిడ్జి నిర్మాణాన్ని వెంటనే పూర్తి చేయాలని కోరుతున్నారు.
