ఫిర్యాదుదారు రమేష్ ఎవరో తనకు తెలియదనీ, ఉద్యోగాల పేరుతో డబ్బులు తీసుకున్నట్టు తనపై వచ్చిన ఆరోపణలు అసత్యమని కస్టడీలో నిడిగుంట అరుణ స్పష్టంచేసింది. గతంలో తాను వైకాపా కార్యకర్తగా పనిచేసినందునే తనను ఉద్దేశపూర్వకంగా కేసుల్లో ఇరికిస్తున్నారని పోలీసుల విచారణలో ఆమె వెల్లడించినట్టు సమాచారం.
ఎస్ఐ, అంగన్వాడీ ఉద్యోగాలు ఇప్పిస్తామంటూ వృద్ధుడిని రూ.24.50 లక్షల మేర మోసం చేసిన కేసులో అరుణతో పాటు మరికొందరిపై ఎస్ఆర్పేట పోలీసు స్టేషన్లో కేసు నమోదు కాగా, అరుణను రెండు రోజుల కస్టడీకి తీసుకుని శుక్రవారం విస్తృతంగా విచారించారు. సీసీఎస్ స్టేషన్లో న్యాయవాదుల సమక్షంలో ప్రశ్నలు అడిగి, అనంతరం ప్రభుత్వాసుపత్రిలో వైద్యపరీక్షలు నిర్వహించారు. తర్వాత ఆమెను న్యాయమూర్తి ఎదుట హాజరుపరచగా, ఈ నెల 28 వరకు రిమాండ్ పొడిగించారు. అనంతరం రైలుమార్గంగా నెల్లూరుకు తరలించారు.
విచారణలో,
పోలీసులు: “2022లో రమేష్ నుంచి ఉద్యోగాల పేరిట డబ్బులు తీసుకున్నారా?”
అరుణ: “ఏ డబ్బులూ తీసుకోలేదు. ఆయన ఎవరో కూడా తెలియదు.”
పోలీసులు: “హోటల్ వద్దకు రమ్మని పిలిచి, విడతల వారీగా రూ.24.50 లక్షలు తీసుకున్నారా?”
అరుణ: “అది పూర్తిగా అబద్ధం.”
పోలీసులు: “మీతో బంగారికి సంబంధం ఉందా? అతనితో కలిసి మోసాలకు పాల్పడుతున్నారా?”
అరుణ: “అతనెవరో కూడా నాకు తెలియదు.”
వ్యక్తిగత విషయాలపై మాట్లాడుతూ, తనకు శ్రీకాంత్తో ప్రేమసంబంధం ఉందని, త్వరలో పెళ్లి చేసుకోవాలని నిర్ణయించుకున్నప్పుడే తమపై కుట్ర పన్ని కేసుల్లో ఇరికించారని అరుణ పోలీసులకు తెలిపినట్టు వెల్లడైంది. త్వరగా బెయిల్ కల్పించి బయటకు తీసుకురావాలని, శ్రీకాంత్ను వివాహం చేసుకోవాలని ఆమె తన న్యాయవాదులకు పునరావృతంగా కోరినట్టు తెలిసింది.
