అమరావతి: కర్నూలు శివారులో జరిగిన వేమూరి కావేరి ట్రావెల్స్ బస్సు ప్రమాదంలో సజీవ దహనమైన బాధితుల మృతదేహాలపై డీఎన్‌ఏ పరీక్షలు కేవలం 13 గంటలలో పూర్తి చేయడం విశేషంగా నిలిచింది. ఈ అద్భుతమైన పనితీరుకు ఏపీ ఫోరెన్సిక్ ప్రయోగశాల డైరెక్టర్ పాలరాజు మరియు సంబంధిత బృందాలను డీజీపీ హరీష్‌కుమార్ గుప్తా శుక్రవారం అభినందించారు.
డీఎన్‌ఏ ప్రొఫైలింగ్ వేగంగా చేయడం వల్ల, మృతదేహాలను బాధితుల కుటుంబాలకు త్వరగా అందించగలిగినట్లు అధికారులు పేర్కొన్నారు. ఘటనా స్థలంలో సేకరించిన భౌతిక, రసాయన మరియు జీవ నమూనాలను విశ్లేషించడం, అలాగే సీన్ రీక్రియేషన్‌లో ఫోరెన్సిక్ బృందాలు కీలక పాత్ర పోషించారని వెల్లడించారు.
ఫోరెన్సిక్ విశ్లేషణలో భాగమైన 16 బృందాల సభ్యులకు డీజీపీ కార్యాలయంలో శుక్రవారం ప్రత్యేక కార్యక్రమంలో ప్రశంసా పత్రాలు అందజేయడం జరిగింది. ఈ సాంకేతిక నైపుణ్యం మరియు సమయపాలన బాధిత కుటుంబాలకు న్యాయం కల్పించడంలో కీలకంగా నిలిచింది.
