హైదరాబాద్‌: వరంగల్‌లోని కాకతీయ మెగా టెక్స్‌టైల్ పార్క్‌లో ఉత్పత్తి ప్రారంభం అయినందుకు భారత రాష్ట్ర సమితి కార్యనిర్వాహక అధ్యక్షుడు కేటీఆర్ (KTR) హర్షం వ్యక్తం చేశారు. ఈ సందర్భంగా ఆయన ‘ఎక్స్’ వేదికపై పోస్ట్ చేశారు.
మొదటి యూనిట్ ఉత్పత్తి ప్రారంభించడం ఆనందంగా ఉందని, ఈ టీషర్టులను ప్రపంచ మార్కెట్లకు ఎగుమతి చేయడం సంతోషకరమని తెలిపారు. ఆయన వివరించగా, తమ ప్రభుత్వ హయాంలో 2023లో కాకతీయ టెక్స్‌టైల్ పార్క్‌లో ఫ్యాక్టరీల శంకుస్థాపన చేశామని, అలాగే 11 యంగ్ వన్ కార్పొరేషన్ ఫ్యాక్టరీలకు భూమిపూజ జరిపినట్లు చెప్పారు.
అన్ని యూనిట్లు పూర్తిగా ప్రారంభమైన తర్వాత, వరంగల్ ప్రధాన వస్త్ర కేంద్రంగా మారబోతుందని కేటీఆర్ పేర్కొన్నారు. ఆయన “వ్యవసాయం నుంచి ఫ్యాషన్” అనే సూత్రంతో టెక్స్‌టైల్ పార్క్‌ను స్థాపించామన్న విషయాన్ని కూడా తెలిపారు.
