ప్రముఖ ఎలక్ట్రానిక్స్ చిప్ల తయారీ సంస్థ ఎన్విడియా (Nvidia) సీఈఓ జెన్సన్ హువాంగ్ తన విజయానికి తల్లి ప్రధాన కారణమని చెప్పారు. ఇంగ్లిష్ మాట్లాడటానికి ఆమెకు అవగాహన లేకపోయినా, తనకు మరియు తన సోదరుడికి ఆ భాష నేర్పించిందని హువాంగ్ తెలిపారు. ఆమె డిక్షనరీ నుంచి రోజుకు కొన్ని పదాలను నేర్చుకుని, వారితో పంచుకొని, వారి అభ్యాసానికి ప్రేరణ ఇచ్చేవారని తెలిపారు. ఈ కృషి కారణంగానే ఆయన జీవితం ఇలానే మారిపోయిందని చెప్పారు.
కేంబ్రిడ్జ్ యూనియన్తో జరిగిన చర్చలో హువాంగ్ ఇలా చెప్పాడు:
“నాకు మా అమ్మే ఇంగ్లీష్ నేర్పించింది. ఆమెకి ఆ భాష రాకపోయినా, మమ్మల్ని అమెరికాకు పంపించాలన్న సంకల్పంతో నేర్చుకొని మాకు నేర్పించింది. అదే ఒకటే నేడు నా జీవితానికి, ఎన్విడియాకు నిర్వచనం.”
తైవాన్లో జన్మించిన హువాంగ్, కుటుంబంతో మొదట థాయ్లాండ్కు వెళ్లారు. 9 ఏళ్ల వయసులో చదువుకు అమెరికాకు పంపారు. ప్రతి రోజు తన తల్లి డిక్షనరీ నుంచి 10 ఆంగ్ల పదాలను కాగితంపై రాసి వాటి స్పెల్లింగ్, అర్థం తెలుసుకోవమని అడిగేది. “మేము చెప్పేది కరెక్టా కాదా?” అని ఆమెకు తెలియకపోయినా, ఇంగ్లిష్ నేర్పించాలన్న తపన ఉండేది. ఆమె ప్రతి రోజూ చేసిన ప్రయత్నాలే నన్ను ఈ స్థాయిలో నిలబెట్టాయి అని హువాంగ్ చెప్పారు.
అలాగే, జెన్సన్ హువాంగ్ ఎన్విడియా స్థాపనలో ఎదుర్కొన్న సవాళ్లను కూడా వివరించారు. కంపెనీ మొదట నిధుల కొరత, వ్యాపార ప్రణాళిక తయారీ వంటి సమస్యలతో ప్రారంభమయ్యిందని తెలిపారు. 1993లో ఎన్విడియా స్థాపించబడింది, 1999లో స్టాక్ ఎక్స్చేంజ్లో లిస్ట్ చేయబడింది. ఏఐ బూమ్ కారణంగా ఇటీవల కంపెనీ విలువ 5 ట్రిలియన్ డాలర్ల కంటే ఎక్కువగా పెరిగింది.
