విజయవాడ విమానాశ్రయానికి 2017లో అంతర్జాతీయ హోదా లభించినప్పటి నుండి దుబాయ్కి నేరుగా విమాన సర్వీసులు ప్రారంభించాలనే అభ్యర్థనలు వస్తూనే ఉన్నాయి. అధికారిక సర్వేల ప్రకారం కూడా, విజయవాడ–దుబాయ్ మార్గం ప్రారంభమైతే సింగపూర్ కంటే ఎక్కువ రద్దీ ఉంటుందని తేలింది. సుమారు 2.5 లక్షల మంది ఈ సర్వీసుకు మద్దతు తెలిపారు. అయినప్పటికీ ఇప్పటి వరకు ఆ ప్రణాళిక అమలుకాలేదు.
విజయవాడ నుంచి దుబాయ్కి నేరుగా విమానాలు నడపడం ద్వారా ప్రపంచంలోని పలు దేశాలతో నేరుగా అనుసంధానం కలుగుతుంది. ముఖ్యంగా అమెరికా (న్యూయార్క్, న్యూజెర్సీ), చైనా, ఆస్ట్రేలియా, లండన్, పారిస్ వంటి నగరాలకు ప్రయాణం మరింత సులభమవుతుంది. ప్రస్తుతం విజయవాడ నుండి మంగళవారం, శనివారం రోజుల్లో షార్జాకు ఒకే ఒక సర్వీసు నడుస్తోంది. నవంబర్ 15 నుంచి సింగపూర్లోని ఛాంగీ విమానాశ్రయానికి మంగళ, గురు, శనివారాల్లో సర్వీసులు ప్రారంభం కానున్నాయి. వీటితో పాటు దుబాయ్ సర్వీసులు ప్రారంభమైతే ప్రతి సంవత్సరం లక్షలాది మంది ప్రయాణికులు లాభపడతారు.
ప్రయాణికుల పెరుగుదల–తగ్గుదల:
విజయవాడ విమానాశ్రయం ద్వారా 2014–15లో కేవలం 2.31 లక్షల మంది మాత్రమే రాకపోకలు సాగించగా, గత తెలుగుదేశం ప్రభుత్వ కాలంలో సర్వీసులు పెరగడంతో 2018–19 నాటికి ఆ సంఖ్య 12 లక్షలను దాటింది. కానీ తర్వాత వైకాపా ప్రభుత్వ కాలంలో అభివృద్ధి క్షీణించి, రోజువారీ విమాన సర్వీసులు 60 నుండి 24కి తగ్గించబడ్డాయి. దీంతో ప్రయాణికుల సంఖ్య కూడా తగ్గిపోయింది. ప్రస్తుతం రోజుకు సుమారు 4,000 మంది ప్రయాణికులు విమానాశ్రయాన్ని వినియోగిస్తున్నారు. అధికారులు 2025–26 నాటికి ఈ సంఖ్య 15 లక్షలు దాటుతుందని అంచనా వేస్తున్నారు.
2019 జనవరిలోనే చంద్రబాబు ప్రభుత్వం వయబిలిటీ గ్యాప్ ఫండింగ్ (VGF) విధానంలో దుబాయ్ సర్వీసులు ప్రారంభించేందుకు చర్యలు చేపట్టింది. ఆంధ్రప్రదేశ్ ఎయిర్పోర్ట్స్ డెవలప్మెంట్ కార్పొరేషన్ (APADCL) ఆధ్వర్యంలో విమానయాన సంస్థల నుంచి బిడ్లు ఆహ్వానించి, తక్కువ ధర కోట్ చేసిన సంస్థను ఎంపిక చేసింది. అయితే, వైకాపా ప్రభుత్వం అధికారంలోకి వచ్చిన తర్వాత సింగపూర్ సర్వీసును నిలిపివేసి, దుబాయ్ ప్రాజెక్ట్ను కూడా నిలిచిపోయేలా చేసింది.
