ఇంటర్నెట్ డెస్క్‌: దర్శకుడు ప్రశాంత్ వర్మ తన ప్రశాంత్ వర్మ సినిమాటిక్ యూనివర్స్ (PVCU) ద్వారా ప్రతి సంవత్సరం ఓ సూపర్ హీరో చిత్రాన్ని ప్రేక్షకుల ముందుకు తీసుకురావాలనే లక్ష్యంతో ముందుకు సాగుతున్నాడు. ‘హనుమాన్’, ‘అధీర’ తర్వాత ఇప్పుడు మూడో చిత్రం ‘మహాకాళి’ రూపుదిద్దుకుంటోంది. ఈ చిత్రంలో శక్తివంతమైన స్త్రీ సూపర్ హీరో పాత్రలో కన్నడ నటి భూమి శెట్టి నటించనున్నారు.
తాజాగా విడుదలైన మహాకాళి ఫస్ట్ లుక్ పోస్టర్లో భూమి శెట్టి ఆకర్షణీయమైన, ఆధ్యాత్మిక శక్తిని ప్రతిబింబించే లుక్‌తో కనిపించారు. “విశ్వంలోనే అత్యంత శక్తివంతమైన సూపర్ హీరో రాబోతోంది” అనే ట్యాగ్‌లైన్‌ పోస్టర్‌కు మరింత ఉత్కంఠను తీసుకువచ్చింది. భూమి శెట్టి ఇటీవల సత్యదేవ్ నటించిన ‘కింగ్డమ్’ చిత్రంలో భార్య పాత్రలో నటించి ఆకట్టుకున్న సంగతి తెలిసిందే.
మహాకాళి చిత్రానికి కథను ప్రశాంత్ వర్మ అందించగా, దర్శకత్వ బాధ్యతలను పూజా అపర్ణ కొల్లూరు చేపట్టారు. ఇప్పటికే 50 శాతం షూటింగ్ పూర్తి కాగా, ప్రస్తుతం హైదరాబాద్‌లో ప్రత్యేకంగా నిర్మించిన భారీ సెట్‌లో చిత్రీకరణ జరుగుతోంది. ఈ సినిమాలో బాలీవుడ్ నటుడు అక్షయ్ ఖన్నా శుక్రాచార్యుడి పాత్రలో కనిపించనున్నారు.
ప్రశాంత్ వర్మ మాట్లాడుతూ – “మా యూనివర్స్‌కు కొత్త శక్తి చేరింది. అతి భయంకరమైన చెడును ఎదుర్కొనే కాళికాదేవి స్వరూపం రానుంది. ఈ సినిమాలో సూపర్ హీరోల శక్తి, ఆధ్యాత్మికత కలయికగా చూపించబోతున్నాం” అని వెల్లడించారు.
ఇదిలా ఉండగా, PVCU యూనివర్స్లో భాగంగా ఇటీవల ప్రకటించిన మరో చిత్రం *‘అధీర’*లో ఎస్‌జే సూర్య, కల్యాణ్ దాసరి ప్రధాన పాత్రల్లో నటించనున్నారు. దీనికి దర్శకుడు శరణ్ కొప్పిశెట్టి దర్శకత్వం వహిస్తున్నారు.
సినీప్రియులు ఆసక్తిగా ఎదురుచూస్తున్న ‘మహాకాళి’, మహిళా సూపర్ హీరోలలో కొత్త అధ్యాయం ఆరంభించనుందనే చెప్పాలి.
