తిరునగరి పరిధిలో చిరుతల సంచారం స్థానికులను ఆందోళనకు గురి చేస్తోంది. అటవీ ప్రాంతాల సమీపంలో నివసించే ప్రజలు మరింత అప్రమత్తంగా ఉండాల్సిన పరిస్థితి నెలకొంది. ముఖ్యంగా ఇళ్లలో లేదా వీధుల్లో కుక్కలు పెంచే వారు జాగ్రత్తగా ఉండాలి, ఎందుకంటే చిరుతల ప్రధాన ఆహారం వీధి కుక్కలే. మనకు రక్షణగా ఉన్న కుక్కలే చిరుతలను ఆకర్షిస్తున్నాయని గుర్తుంచుకోవాలి.
చిరుతలు మనుషులపై ఎందుకు దాడి చేస్తాయి?
సాధారణంగా 8–10 ఏళ్ల వయస్సు దాటిన చిరుతలకు కోరదంతాలు రాలిపోతాయి. దీంతో అవి వేటాడి మాంసం తినలేకపోతాయి. అలాంటి సందర్భాల్లో చిన్నపిల్లలు లేదా సులభంగా దొరికే మనుషులపై దాడి చేసే అవకాశం ఉంటుంది.
తల్లి చిరుత తన పిల్లలను రెండు సంవత్సరాల వరకు సంరక్షిస్తుంది, వేటాడటం నేర్పుతుంది. కానీ తల్లి నుంచి త్వరగా వేరుపడిన పిల్లలు ఆహారం కోసం మనుషులపై దాడి చేయడానికి ప్రయత్నిస్తాయి.
అటవీశాఖ చర్యలు
చిరుతలు, ఎలుగుబంట్లు, ఏనుగుల సంచారంపై సమాచారం అందగానే వైల్డ్లైఫ్ మానిటరింగ్ సెల్ రక్షణ బృందం తక్షణమే రంగంలోకి దిగుతుంది. 15 మంది సుశిక్షిత సిబ్బందితో ప్రత్యేక బృందాన్ని అటవీశాఖ ఏర్పాటు చేసింది.
తాజా ఘటన
మంగళం అటవీ ప్రాంతానికి సమీపంలోని భూపాల్ హౌసింగ్ కాలనీలో సోమవారం తెల్లవారుజామున చిరుత ప్రవేశించింది. సమీప ఇంట్లో కట్టేసి ఉన్న కుక్కపై దాడి చేసి చంపేసింది. ఈ ఘటన సీసీ కెమెరాలో రికార్డైంది. చిరుతను గుర్తించేందుకు అటవీ అధికారులు గాలింపు ప్రారంభించి, కెమెరా ట్రాప్లు ఏర్పాటు చేయాలని తెలిపారు.
చిరుతల సంచార ప్రాంతాలు
అలిపిరి, శ్రీవారి మెట్టు, అవ్వాచారికోన, పాపనాశనం డ్యామ్ తూర్పుభాగం, మామండూరు, చైతన్యపురం, తలకోన, కల్యాణీ డ్యామ్ ప్రాంతాల్లో ఎక్కువగా చిరుతలు సంచరిస్తున్నాయి.
జూపార్క్ నుంచి మంగళం వరకు ఉన్న అటవీ దిగువభాగంలో దాదాపు 10 చిరుతలు సంచరిస్తున్నాయి. నగర పరిధిలోని అటవీ సరిహద్దు ప్రాంతాలు — ఎస్వీయూ, ఎస్వీ వెటర్నరీ, ఎస్వీ అగ్రికల్చరల్, వేదిక్ యూనివర్సిటీలు, సైన్స్ సెంటర్, జూపార్క్, జీవకోన, తిమ్మినాయుడుపాలెం, భూపాల్ హౌసింగ్ కాలనీ, కేంద్రీయ ఎర్రచందనం గోదాములు, మంగళం ప్రాంతాలు — ప్రధానంగా చిరుతల సంచారం కనిపిస్తున్న ప్రదేశాలు.
