సుమారు రూ.7 కోట్ల వ్యయంతో విశాఖపట్టణంలోని కైలాసగిరిపై నిర్మించిన ప్రతిష్టాత్మక గ్లాస్ బ్రిడ్జ్ను ఎంపీ శ్రీ భరత్, మేయర్ పీలా శ్రీనివాసరావు ఘనంగా ప్రారంభించారు. ఈ కార్యక్రమంలో ఎమ్మెల్యే వెలగపూడి రామకృష్ణబాబు, వీఎంఆర్డీఏ ఛైర్మన్ ప్రణవ్ గోపాల్ తదితరులు పాల్గొన్నారు.
ఈ సందర్భంగా ప్రణవ్ గోపాల్ మాట్లాడుతూ—
“విశాఖను దేశంలోనే అగ్రశ్రేణి పర్యాటక కేంద్రంగా తీర్చిదిద్దేందుకు వీఎంఆర్డీఏ పలు కీలక ప్రాజెక్టులు చేపడుతోంది. త్వరలో కైలాసగిరి త్రిశూల్ ప్రాజెక్ట్ను కూడా ప్రజలకు అందుబాటులోకి తీసుకురాబోతున్నాం,” అని తెలిపారు.
ఈ గ్లాస్ బ్రిడ్జ్ నిర్మాణంలో 40 ఎంఎం మందం గల జర్మనీ దిగుమతి గ్లాస్ను ఉపయోగించారు. ఒకేసారి 500 టన్నుల బరువు తట్టుకునే సామర్థ్యంతో పాటు, గంటకు 250 కిలోమీటర్ల వేగంతో వీచే గాలులకు కూడా ఈ నిర్మాణం ప్రతిఘటన చూపగలిగేలా డిజైన్ చేయబడింది.
పర్యాటకులు ఒకేసారి 40 మంది వరకు ఈ బ్రిడ్జిపై నడుచుకుంటూ కైలాసగిరి పరిసరాల్లోని సముద్ర తీర అందాలను ఆస్వాదించవచ్చు.
ఈ కొత్త ఆకర్షణతో విశాఖ పర్యాటక రంగానికి మరింత ఊపు రావచ్చని అధికారులు భావిస్తున్నారు.
