హైదరాబాద్: మొంథా తుపాను ప్రభావంతో హైదరాబాద్ సహా తెలంగాణా రాష్ట్రంలోని అనేక జిల్లాల్లో భారీ వర్షాలు కురుస్తున్నాయి. హైదరాబాద్లోని గచ్చిబౌలి, ఖాజాగూడ, నానక్రాంగూడ, ముషీరాబాద్, ఆర్టీసీ క్రాస్ రోడ్స్, గాంధీనగర్, కవాడిగూడ, భోలక్పూర్, అంబర్పేట, కాచిగూడ, నల్లకుంట, బర్కత్పురా, బీఎన్రెడ్డినగర్, మీర్పేట్, బాలాపూర్, బడంగ్పేట్, మహేశ్వరం, తుక్కుగూడ, పహాడీషరీఫ్, జవహర్నగర్, చిక్కడపల్లి, బాగ్లింగంపల్లి, దోమలగూడ ప్రాంతాల్లో వర్షం కురుస్తోంది. రహదారులపై నీరు చేరడంతో రాకపోకలకు అంతరాయం ఏర్పడింది.
అత్యధిక వర్షపాతం నమోదులు
నాగర్కర్నూల్ జిల్లా ఉప్పునుంతలలో అత్యధికంగా 20.8 సెం.మీ వర్షం నమోదైంది. ఇతర ప్రాంతాల వర్షపాతం వివరాలు ఇలా ఉన్నాయి:
- అమ్రాబాద్: 19.7 సెం.మీ
- తెల్దేవరపల్లి (నల్గొండ): 18.5 సెం.మీ
- వెల్టూర్ (నాగర్కర్నూల్): 18.3 సెం.మీ
- ఐనోలు: 17.8 సెం.మీ
- ఎర్రారం, పోలేపల్లి (నల్గొండ): 15.1, 13.3 సెం.మీ
- వెలిజాలు (రంగారెడ్డి): 13.9 సెం.మీ
- రేవల్లి (వనపర్తి): 12.6 సెం.మీ
- మిడ్జిల్ (మహబూబ్ నగర్): 11.9 సెం.మీ
నదులు, వాగులు ఉద్ధృతంగా ప్రవహిస్తున్నాయి
నాగర్కర్నూల్ జిల్లా ఉరువకొండ, కల్వకుర్తి, వెల్దండ, ఆమన్గల్, వంగూర్, చారగొండ మండలాల్లో వర్షం కురుస్తుండటంతో మంద వాగు ఉద్ధృతంగా ప్రవహిస్తోంది. ఎర్రవల్లి-గోకారం మధ్య రాకపోకలు నిలిచాయి. బైరాపూర్ వద్ద రోడ్డుపై వాగు ఉద్ధృతంగా ప్రవహించడం రాకపోకలకు ఇబ్బందులు కలిగిస్తోంది. అచ్చంపేట-శ్రీశైలం రహదారిపై చంద్ర వాగు ఉద్ధృతంగా ప్రవహిస్తోంది. మిడ్జిల్ మండలం కొత్తూరు-వేలుగోముల మధ్య దుందుభి వాగు ప్రవహణం కారణంగా పలు గ్రామాలకు రాకపోకలు నిలిచాయి.
వర్ష సూచనలు
తుపానా ప్రభావంతో ఆదిలాబాద్, నిర్మల్, జగిత్యాల, మంచిర్యాల, పెద్దపల్లి, జయశంకర్ భూపాలపల్లి, ములుగు, కరీంనగర్, వరంగల్, మహబూబాబాద్, ఖమ్మం, భద్రాద్రి కొత్తగూడెం జిల్లాల్లో అతి భారీ వర్షం కురిసే అవకాశం ఉంది. ఈ జిల్లాలకు వాతావరణ శాఖ ఆరెంజ్ హెచ్చరికలు జారీ చేసింది.
కుమురం భీం, నిజామాబాద్, రాజన్న సిరిసిల్ల, సిద్దిపేట, హనుమకొండ, జనగామ, యాదాద్రి భువనగిరి జిల్లాల్లో భారీ వర్షాలు కురిసే అవకాశం ఉంది. ఈ ప్రాంతాలకు ఎల్లో హెచ్చరికలు ఇచ్చారు.
ఉమ్మడి మహబూబ్ నగర్, రంగారెడ్డి, హైదరాబాద్, నల్గొండ, సూర్యాపేట, మెదక్, సంగారెడ్డి, కామారెడ్డి జిల్లాల్లో తేలికపాటి నుంచి మోస్తరు వర్షాలు కురిసే అవకాశం ఉంది.
వర్షం ఇంకా కొనసాగుతుండటంతో ప్రజలకు భద్రతా చర్యలు తీసుకోవాలని, తుఫాను ప్రభావిత ప్రాంతాల్లో అప్రమత్తంగా ఉండాలని అధికారులు హెచ్చరించారు.
