కేంద్ర ప్రభుత్వం మొబైల్ తయారీ కంపెనీలకు కీలక ఆదేశాలు జారీ చేసింది. కొత్తగా విడుదలయ్యే ఫోన్లలో కేంద్రం రూపొందించిన సైబర్ సెక్యూరిటీ యాప్ ‘సంచార్ సాథీ’ని (Sanchar Saathi) డిఫాల్ట్గా ఇన్స్టాల్ చేయాలని సూచించింది. ఇతర యాప్లలా యూజర్లు దీన్ని డిలీట్ చేయలేరు అని కూడా స్పష్టమైంది. ఈ విషయాన్ని ‘రాయిటర్స్’ సంస్థ తన కథనంలో తెలిపింది.
దేశంలో 100 కోట్లకు పైగా మొబైల్ వినియోగదారులు ఉన్నప్పటికీ, సైబర్ నేరాలు, ఫోన్ చోరీలు పెద్ద సమస్యగా మారాయి. ఈ పరిస్థితిలో, పోయిన ఫోన్లను గుర్తించేందుకు కేంద్రం ఈ ఏడాది జనవరిలో సంచార్ సాథీ యాప్ను విడుదల చేసింది. ఇప్పటి వరకు సుమారు 7 లక్షల చోరీకి గురైన ఫోన్లను ఈ యాప్ సాయంతో గుర్తించగలిగింది. ఈ యాప్ సైబర్ సెక్యూరిటీ ముప్పులను ఎదుర్కోవడంలో, IMEI స్పూఫింగ్ను నివారించడంలో ఉపయోగపడుతోంది.
కేంద్ర టెలికాం మంత్రిత్వ శాఖ ఈ యాప్ డిఫాల్ట్గా అన్ని కొత్త మొబైల్లలో ఉండేలా అన్ని టెలికాం సంస్థలకు ఆదేశాలు జారీ చేసింది. మొబైల్ కంపెనీలకు ఈ అమలుకు 90 రోజులు గడువు ఇవ్వబడింది. ఇప్పటికే మార్కెట్లో ఉన్న ఫోన్లకు సాఫ్ట్వేర్ అప్డేట్ ద్వారా ఈ యాప్ను అందించాలని సూచించబడింది.
కానీ ప్రొప్రైటరీ యాప్ల మినహా ప్రభుత్వ లేదా థర్డ్ పార్టీ యాప్లను ముందుగా ఇన్స్టాల్ చేయడానికి యాపిల్ వ్యతిరేకంగా ఉన్నట్లు తెలుస్తోంది. గతంలో కూడా కొన్ని ప్రభుత్వ ఆదేశాలను యాపిల్ తిరస్కరించిన సందర్భాలు ఉన్నాయని సంబంధిత వర్గాలు వెల్లడించాయి. ప్రస్తుతానికి, ఈ అంశంపై ప్రభుత్వం, ప్రధాన మొబైల్ తయారీ కంపెనీలు—యాపిల్, గూగుల్, శాంసంగ్ ఇంకా స్పందించలేదు.
