దేశవ్యాప్తంగా వాణిజ్య డ్రోన్ల వినియోగం వేగంగా పెరుగుతున్న నేపథ్యంలో వాటి వల్ల కలుగుతున్న భద్రతా సమస్యలను దృష్టిలో ఉంచుకుని, డ్రోన్ ముప్పును అడ్డుకునే ప్రత్యేక సాంకేతిక పరిజ్ఞానాన్ని కర్నూలు ట్రిపుల్ఐటీ–డీఎం (ఇండియన్ ఇన్స్టిట్యూట్ ఆఫ్ ఇన్ఫర్మేషన్ టెక్నాలజీ, డిజైన్ అండ్ మాన్యుఫ్యాక్చరింగ్) అభివృద్ధి చేసింది.
డ్రోన్ల వినియోగం ద్వారా అనేక ప్రయోజనాలు లభిస్తున్నా, కొందరు వాటిని నిషేధిత ప్రాంతాల్లో ఫొటోలు, వీడియోలు తీసేందుకు లేదా ప్రభుత్వ, ప్రైవేట్ సంస్థలపై దాడులకు ఉపయోగించే అవకాశం ఉందని అధికారులు హెచ్చరిస్తున్నారు. దీంతో డ్రోన్లు ఎగరడానికి ముందుగా అనుమతులు తీసుకోవాలని కేంద్ర, రాష్ట్ర ప్రభుత్వాలు ఆదేశించినా, కొందరు వాటిని పట్టించుకోవడం లేదు.
ఈ సమస్యను పరిష్కరించడానికి ఆచార్యుడు డాక్టర్ కృష్ణనాయక్, పరిశోధక విద్యార్థి వెంకటరాజులు కలిసి “యాంటీ డ్రోన్ టెక్నాలజీ”ని రూపొందించారు.
సాధారణంగా డ్రోన్లు ఐఎస్ఎం (ఇండస్ట్రియల్, సైంటిఫిక్, మెడికల్) బ్యాండ్ లేదా లైసెన్స్ పొందిన ఫ్రీక్వెన్సీలతో పనిచేస్తాయి. పైలట్ ఇచ్చే ఆదేశాలు ఈ ఫ్రీక్వెన్సీల ద్వారా డ్రోన్కు చేరతాయి. ట్రిపుల్ఐటీ–డీఎం రూపొందించిన ఈ రక్షణ వ్యవస్థ ఆ రేడియో తరంగాలను స్తంభింపజేస్తుంది. నిర్ణీత పరిధిలో అనుమతించని ఫ్రీక్వెన్సీలను పూర్తిగా నిరోధిస్తుంది.
ఈ వ్యవస్థ విడుదల చేసే రేడియో తరంగాలు ఇల్లు లేదా సంస్థ చుట్టూ రక్షణ కవచంలా పనిచేస్తాయి. పైలట్ నుంచి వచ్చే సంకేతాలను, డ్రోన్లోని జీపీఎస్ రిసీవర్ను కూడా నిరోధించడం వల్ల కొద్దిసేపటికే డ్రోన్ కూలిపోతుంది.
“ప్రస్తుతం ఇది 100 మీటర్ల ఎత్తు వరకు పనిచేస్తుంది. మరింత విస్తృతంగా అభివృద్ధి చేసేందుకు భారత ప్రభుత్వ శాస్త్ర సాంకేతిక విభాగం (DST) నుంచి రూ.40 లక్షల నిధులు మంజూరయ్యాయి,” అని ఆచార్యుడు డాక్టర్ కృష్ణనాయక్ తెలిపారు.
