నందమూరి బాలకృష్ణ చెప్పారు: “హిందూ సనాతన ధర్మంలోని శక్తి పరాక్రమాన్ని ‘అఖండ 2: తాండవం’లో చూడవచ్చు.” ప్రతి ఒక్కరు తమ పిల్లలను తీసుకెళ్ళి ఈ సినిమా చూడాలని ఆయన సూచించారు. బాలకృష్ణ బోయపాటి శ్రీను దర్శకత్వంలో రూపొందిన ఈ పాన్ ఇండియా చిత్రంలో రామ్ ఆచంట, గోపీ ఆచంట నిర్మాతలు. సంయుక్తా మేనన్ కథానాయికగా, ఆది పినిశెట్టి, జగపతిబాబు తదితరులు కీలక పాత్రల్లో కనిపించారు. సినిమా డిసెంబర్ 5న థియేటర్లలో విడుదల కాబోతోంది.
శుక్రవారం ముంబయిలో చిత్ర గీతాన్ని విడుదల చేశారు. ‘‘రంగ రంగ శంభు లింగ ఈశ్వర.. అంతరంగా హే భుజంగా శంకర’’ అనే భక్తి పాటకు తమన్ స్వరాలు సమకూర్చారు, కల్యాణ్ చక్రవర్తి సాహిత్యం అందించారు, శంకర్ మహదేవన్, కైలాశ్ ఖేర్ ఆలపించారు.
ఈ సందర్భంగా బాలకృష్ణ మాట్లాడుతూ, ‘‘నాది, బోయపాటిది విజయవంతమైన కలయిక. మేమిద్దరం కలిసి చేసిన గత మూడు చిత్రాలు విజయవంతమయ్యాయి. ఇది మాకు నాలుగో సినిమా’’ అన్నారు. ‘‘ఇది కేవలం సినిమా కాదు, భారతదేశ ఆత్మ. ఇది మన ధర్మం. కుటుంబమంతా కలిసి చూడదగిన సినిమా. మేము అత్యంత శీతల వాతావరణంలో చిత్రీకరణ చేసాము. అలాంటి పరిస్థితుల్లో మేమంతా స్వెటర్లు వేసుకుని జాగ్రత్తలు తీసుకున్నాం. బాలకృష్ణ మాత్రం సాధారణ పంచె కట్టుకుని నటించారు. ఇది ఆయన నటన పట్ల ఉన్న నిబద్ధతకు నిదర్శనం. మా వెనుక శివయ్యే ఉండి చిత్రాన్ని పూర్తి చేశారు’’ అని దర్శకుడు బోయపాటి శ్రీను తెలిపారు.
ఈ కార్యక్రమంలో తమన్, ఆది పినిశెట్టి, కైలాశ్ ఖేర్, గోపీ ఆచంట, హర్షాలి తదితరులు పాల్గొన్నారు.
