అమరావతి: మొంథా తుపాన్ ప్రభావంపై ప్రధాన మంత్రి నరేంద్ర మోదీ ఆంధ్రప్రదేశ్ ముఖ్యమంత్రి చంద్రబాబుతో టెలిఫోన్ ద్వారా మాట్లాడారు. తుపాన్ పరిస్థితులు, రాష్ట్ర ప్రభుత్వం తీసుకుంటున్న జాగ్రత్తలు, పునరావాస చర్యలను మోదీకి సీఎం వివరించారు.
ఈ సందర్భంగా సీఎం చంద్రబాబు, పీఎంవోతో సమన్వయం చేసుకోవాలని మంత్రి నారా లోకేష్‌కు ఆదేశాలు ఇచ్చారు. తుపాన్ కదలికలను క్షుణ్ణంగా గమనిస్తూ ప్రతి జిల్లా యంత్రాంగం అప్రమత్తంగా ఉండాలని సీఎం సూచించారు.
వర్షాలు, వరదలు సంభవించే అవకాశమున్న ప్రాంతాల్లో ముందస్తు చర్యలు తీసుకోవాలని ఆయన అధికారులను ఆదేశించారు. సచివాలయంలో జరిగిన సమీక్ష సమావేశంలో మంత్రి లోకేష్, మంత్రి అనిత, ప్రధాన కార్యదర్శి, పలు ఉన్నతాధికారులు పాల్గొన్నారు.
సంక్షోభ సమయంలో ప్రభుత్వం పూర్తి సమన్వయంతో ప్రజల భద్రతను ప్రాధాన్యంగా తీసుకుంటోందని సీఎం తెలిపారు.
