బిహార్ ఎన్నికలపై ఆర్జేడీ నేత, మహాగఠ్బంధన్ ముఖ్యమంత్రి అభ్యర్థి తేజస్వీ యాదవ్ తీవ్ర విమర్శలు చేశారు. మొదటి దశ పోలింగ్ ముగిసి నాలుగు రోజులు గడిచినా, స్త్రీ–పురుష–తృతీయ లింగ ఓటర్ల వివరాలు ఇంకా ఎందుకు వెల్లడించలేదని ఆయన ఎన్నికల సంఘాన్ని ప్రశ్నించారు. గత ఎన్నికల్లో ఈ వివరాలు వెంటనే విడుదల చేసేవారని గుర్తుచేశారు.
సోమవారం విలేకరుల సమావేశంలో మాట్లాడుతూ, బిహార్లో ఓట్ల దోపిడీ, వంచన వంటి చర్యలను మహాగఠ్బంధన్ సహించదని తేజస్వీ స్పష్టం చేశారు. ఈ ఎన్నికల్లో విజయం తమదేనని నమ్మకం వ్యక్తం చేస్తూ, నవంబర్ 18న ప్రమాణ స్వీకారం చేస్తామని తెలిపారు. బిహార్లో శాంతి, భద్రతల విషయంలో రాజీపడబోమని, గెలిచిన తర్వాత నేరస్థులు, మతతత్వవాదులు, అవినీతిపరులపై కఠిన చర్యలు తీసుకుంటామని చెప్పారు.
ప్రధాని నరేంద్ర మోదీ, కేంద్ర హోంమంత్రి అమిత్ షా నాయకత్వంలో ఎన్నికల సంఘం సమర్థంగా పనిచేయడం లేదని ఆయన ఆరోపించారు. ఈసీ అమిత్ షా ప్రాభవంలోకి వెళ్లి సమస్యలు సృష్టిస్తే, అధికారులే తీవ్ర పరిణామాలను ఎదుర్కోవాల్సి వస్తుందని హెచ్చరించారు.
తేజస్వీ వ్యాఖ్యలపై ఎన్నికల సంఘం స్పందిస్తూ, స్త్రీ, పురుష ఓటర్ల వివరాలు సాధారణంగా తుది పోలింగ్ అనంతరం ప్రకటిస్తామని, ఈసారి కూడా అలాగే విడుదల చేస్తామని తెలిపింది.
అదే సమయంలో, బిహార్లో భద్రతా బాధ్యతలు నిర్వర్తిస్తున్న పోలీసుల్లో 68 శాతం మంది బీజేపీ పాలిత రాష్ట్రాలకు చెందినవారని తేజస్వీ ప్రశ్నించారు. వారిపై నిఘా ఉంచుతున్నామని పేర్కొంటూ, “బయటి వ్యక్తులు, ముఖ్యంగా అమిత్ షా బిహార్ను నియంత్రించాలని చూస్తున్నారు… కానీ బిహార్ ప్రజలు అది జరగనివ్వరు” అని ఆయన అన్నారు.
