గూగుల్ డేటా సెంటర్ కోసం విశాఖపట్నం జిల్లా భీమిలి నియోజకవర్గం ఆనందపురం మండలంలోని తర్లువాడలో భూసేకరణ వేగంగా కొనసాగుతోంది. ఈ ప్రాజెక్ట్ కోసం ప్రభుత్వం భూముల రిజిస్ట్రేషన్ విలువను రూ.20 లక్షలకు పెంచుతూ ఉత్తర్వులు జారీ చేయడంతో రైతులకు అధిక పరిహారం లభించే అవకాశం ఏర్పడింది. దీంతో చాలా మంది రైతులు స్వచ్ఛందంగా భూములు ఇవ్వడానికి ముందుకు వస్తున్నారు. అడ్డంకులు సృష్టించే కొన్ని వర్గాలు ప్రయత్నిస్తున్నప్పటికీ, ఇప్పటికి 60% పైగా రైతులు అంగీకార పత్రాలు సమర్పించారు.
భూములిచ్చిన రైతులకు ప్రభుత్వం ఇచ్చే ప్రయోజనాలపై అవగాహన కల్పించేందుకు ఎమ్మెల్యే గంటా శ్రీనివాసరావు మరియు కలెక్టర్ ఎం.ఎన్. హరేంద్ర ప్రసాద్ విశాఖ సర్క్యూట్ హౌస్లో సమావేశం నిర్వహించగా, రైతులు పెద్ద సంఖ్యలో హాజరయ్యారు. వైకాపా నేత మజ్జి వెంకట్రావు కూడా సమావేశంలో పాల్గొని అంగీకార పత్రాన్ని సమర్పించారు. పరిహారం మొత్తాన్ని ప్రభుత్వం రైతుల ఖాతాల్లో శనివారం నుండి జమ చేయనుంది.
రైతుల డిమాండ్లకు ప్రభుత్వం సమ్మతం
గూగుల్ డేటా సెంటర్ కోసం 308.657 ఎకరాల భూమిని APIIC ఇండస్ట్రియల్ పార్క్ పేరుతో సేకరించనున్నారు. ఇందులో డీ-పట్టా మరియు రికార్డుల్లో లేని శివాయ్ జమీందార్ భూములు ఉన్నాయి. డిమాండ్ మేరకు:
- డీపట్టా భూములకు ఎకరానికి ₹20 లక్షలు
- రికార్డుల్లో లేని శివాయ్ జమేదార్ భూములకు ఎకరానికి ₹10 లక్షలు
అదే విధంగా, ఎకరం భూమి ఇచ్చిన రైతులకు 80 సెంట్లకు పరిహారం + 20 సెంట్ల భూమి తిరిగి కేటాయింపు నిర్ణయం తీసుకున్నారు.
