జగన్ శైలిలో శక్తి ప్రదర్శన

యూరప్‌ పర్యటనకు అనుమతి మంజూరులో భాగంగా విధించిన షరతుల మేరకు, ఆంధ్రప్రదేశ్ మాజీ ముఖ్యమంత్రి మరియు అక్రమాస్తుల కేసులో ప్రధాన నిందితుడైన వైఎస్‌ జగన్‌మోహన్‌రెడ్డి గురువారం హైదరాబాద్‌లోని సీబీఐ ప్రధాన కోర్టుకు హాజరయ్యారు. బేగంపేట నుంచి నాంపల్లిలోని సీబీఐ కోర్టు వరకు ఆయన అనుచరులతో కలిసి ర్యాలీగా చేరుకున్నారు. రాజకీయ శక్తి ప్రదర్శనలా సాగిన ఈ ర్యాలీలో అనుచరులు బేగంపేట, కోర్టు పరిసర ప్రాంతాల్లో నినాదాలతో హోరెత్తించారు. భవిష్యత్తులో కోర్టు హాజరు ఎలా ఉండబోతుందో సూచించేలా కనిపించిన ఈ బల ప్రదర్శన ప్రత్యేకంగా నిలిచింది. తరచూ బెంగళూరు, విజయవాడ ప్రయాణాల్లో కనిపించని ఈ హడావుడి.ఈసారి కోర్టు హాజరు సందర్భంగా మాత్రం భారీగా ఎత్తిపొడవబడింది.

బేగంపేటలో ఉద్రిక్తత

జగన్‌ను కలుసుకోవడానికి కార్యకర్తలు బేగంపేటలో పోలీసులతో తోపులాటకు దిగారు. పరిస్థితిని అదుపులోకి తెచ్చేందుకు పోలీసులు తీవ్రంగా శ్రమించాల్సి వచ్చింది. అక్కడ ఉన్న పూలకుండీలు పగిలిపోయాయి. మాజీ మంత్రులు ధర్మాన ప్రసాదరావు, పేర్ని నాని తదితరులు అక్కడకు చేరుకున్నారు. ధర్మాన కోర్టు ఆవరణలోకి వెళ్లగా, పేర్ని నానికి అనుమతి ఇవ్వలేదు. కోర్టు నుంచి కొంతదూరం వరకు అన్ని వాహనాలనూ పోలీసులు ఆపేసి, జగన్ కాన్వాయ్‌లోని రెండు వాహనాలకే ప్రవేశం కల్పించారు.

కోర్టు ఆవరణలో కూడా న్యాయవాదులు జగన్‌ను కలుసుకోవడానికి పోటీపడ్డారు. పలువురు న్యాయవాదులు విజయవాడ నుంచి ప్రత్యేకంగా వచ్చారు. కేసులకు సంబంధం లేని న్యాయవాదులూ కోర్టు లోపలకు రావడంతో కోర్టు హాలుకు బయట కూడా తోపులాటలు జరిగాయి. సెల్ఫీలు, కరచాలనం కోసం న్యాయవాదులు పోటీ పడగా, పోలీసులు అదుపు చేయలేకపోయారు. చివరకు అనుచరులు జగన్ చుట్టూ రక్షణ గోడలా నిలిచి ఆయనను బయటకు తీసుకెళ్లారు.

కోర్టులో సంఘటనలు

కోర్టు హాలులోకి వచ్చిన జగన్‌ సుమారు 15–20 నిమిషాలు కూర్చున్నారు. ఆయన తరఫు న్యాయవాది జి. అశోక్‌రెడ్డి హాజరు మెమో సమర్పించి, పర్యటనకు అనుమతి షరతుల ప్రకారం కోర్టుకు హాజరైనట్లు తెలిపారు. ఈ సందర్భంగా న్యాయమూర్తి డాక్టర్‌ టి. రఘురాం “ఏమైనా చెప్పాలనుకుంటున్నారా?” అని అడగగా జగన్ “ఏమీలేదు” అని సమాధానమిచ్చారు. తరువాత పిటిషన్ విచారణను జడ్జి ముగించారు.

సునీత సమక్షం

జగన్ హాజరైన సమయంలోనే, మాజీ మంత్రి వివేకానందరెడ్డి కుమార్తె నర్రెడ్డి సునీత కూడా కోర్టు హాలులో ఉన్నారు. వివేకా హత్య కేసులో సీబీఐ దర్యాప్తు కొనసాగించాలంటూ ఆమె వేసిన పిటిషన్ విచారణ కారణంగా ఆమె హాజరయ్యారు.

బయట నినాదాల వెల్లువ

జగన్‌ రాకతో కోర్టుకు దారితీసే నాంపల్లి మార్కెట్, రెడ్‌హిల్స్, దేవీబాగ్, ఖైరతాబాద్ మార్గాలను పోలీసులు ఉదయం నుంచే బారికేడ్లు వేసి మూసివేశారు. కాన్వాయ్ రాగానే వైకాపా కార్యకర్తలు రోడ్ల ఇరువైపులా గుంపులుగా నిలబడి నినాదాలు అరిచారు. కోర్టు లోపల విచారణ జరుగుతుండగా వెలుపల “సీఎం-CM”, “2029 రప్పా రప్పా” అంటూ నినాదాలు మార్మోగాయి.