అమరావతి: మాజీ రాష్ట్రపతి, భారత దేశానికి మార్గదర్శకుడైన డా. ఏపీజే అబ్దుల్ కలాం జయంతిని టీడీపీ రాష్ట్ర కార్యాలయంలో బుధవారం ఘనంగా నిర్వహించారు. పార్టీ నాయకులు, కార్యకర్తలు అబ్దుల్ కలాం చిత్రపటానికి పూలమాలలు వేసి నివాళులర్పించారు.
ఈ సందర్భంగా పలువురు నేతలు మాట్లాడుతూ, “అబ్దుల్ కలాం అరుదైన వ్యక్తిత్వం, సాదాసీదా జీవనశైలి, ఉన్నత ఆలోచనలతో కోట్లాది యువతకు ప్రేరణగా నిలిచారు” అని అన్నారు. ఆయన దేశ రక్షణ, అణు శక్తి, అంతరిక్ష పరిశోధన రంగాల్లో చేసిన సేవలు భారతదేశాన్ని ప్రపంచ పటంలో నిలబెట్టాయని గుర్తు చేశారు.
సీఎం చంద్రబాబు నాయుడు వీడియో కాన్ఫరెన్స్ ద్వారా ప్రసంగిస్తూ, “అబ్దుల్ కలాం అసాధారణ వ్యక్తిత్వం కలిగిన మహానుభావుడు. దేశ అణు, శాస్త్ర సాంకేతిక రంగాలకు సరికొత్త దిశను చూపించారు. యువతకు ఆయన జీవితం ఒక పాఠం” అని పేర్కొన్నారు.
ఈ కార్యక్రమంలో పార్టీ ముఖ్యనేతలు, ఎమ్మెల్యేలు, ఐటీ శాఖ ప్రతినిధులు, విద్యార్థులు పెద్ద ఎత్తున పాల్గొన్నారు. అనంతరం యువతకు ప్రేరణగా నిలిచిన అబ్దుల్ కలాం స్ఫూర్తితో సేవా కార్యక్రమాలు నిర్వహించాలని టీడీపీ నేతలు నిర్ణయించారు.
