తమిళనాడు పుణ్యక్షేత్రాల యాత్రకు భారత్ గౌరవ్ రైలు

భక్తులకు ప్రత్యేకంగా ఐఆర్‌సీటీసీ ‘భారత్ గౌరవ్ టూరిస్ట్ రైలు’ ద్వారా తమిళనాడు పుణ్యక్షేత్రాల యాత్ర ప్యాకేజీని ప్రకటించింది. మొత్తం 7 రాత్రులు, 8 రోజుల పాటు సాగే ఈ యాత్రలో తమిళనాడులోని ప్రముఖ దేవాలయాలను దర్శించుకునే అవకాశం ఉంటుంది. ప్రయాణికులు టూ-టైర్ ఏసీ, త్రీ-టైర్ ఏసీ, స్లీపర్ క్లాస్ కోచ్‌లలో ప్రయాణించవచ్చు. ఈ ప్యాకేజీ ధరలు రూ.14,500 నుంచి ప్రారంభమవుతున్నాయి.

ఈ యాత్రలో తిరువణ్ణామలై (అరుణాచలం), రామేశ్వరం, మధురై, కన్యాకుమారి, తిరుచ్చి, తంజావూరు, చిదంబరం వంటి ప్రసిద్ధ పుణ్యక్షేత్రాలను దర్శించే అవకాశం ఉంటుంది. భారత్ గౌరవ్ టూరిస్ట్ రైలు మే 24న సికింద్రాబాద్ నుంచి ప్రారంభమవుతుంది. తెలంగాణ, ఆంధ్రప్రదేశ్ రాష్ట్రాల్లోని పలు రైల్వే స్టేషన్లలో ప్రయాణికులు ఈ రైలులో ఎక్కే సౌకర్యం ఉంది.

సికింద్రాబాద్‌తో పాటు జనగామ, కాజీపేట, వరంగల్, మహబూబాబాద్, ఖమ్మం, మధిర, విజయవాడ, తెనాలి, ఒంగోలు, నెల్లూరు, గూడూరు, రేణిగుంట స్టేషన్లలో యాత్రికులు రైలు ఎక్కవచ్చు. యాత్ర ముగిసిన తరువాత కూడా ఆయా స్టేషన్లలో దిగే అవకాశం కల్పించారు.

యాత్ర వివరాలు

మే 24న మధ్యాహ్నం సికింద్రాబాద్ నుంచి రైలు బయలుదేరుతుంది.
రెండో రోజు ఉదయం అరుణాచలం చేరుకొని అక్కడి ప్రసిద్ధ అరుణాచలేశ్వర స్వామి ఆలయాన్ని దర్శించుకుంటారు.

మూడో రోజు రామేశ్వరం చేరుకొని రామనాథస్వామి ఆలయం దర్శనం ఉంటుంది. అక్కడ రాత్రి బస ఏర్పాటు చేస్తారు.

నాలుగో రోజు మధురై చేరుకుని ప్రసిద్ధ మీనాక్షి అమ్మవారి ఆలయాన్ని దర్శించుకుంటారు. అనంతరం కన్యాకుమారికి ప్రయాణం కొనసాగుతుంది.

ఐదో రోజు ఉదయం కన్యాకుమారి చేరుకుని అక్కడి ప్రకృతి అందాలను ఆస్వాదించే అవకాశం ఉంటుంది. వివేకానంద రాక్ మెమోరియల్, గాంధీ మండపం వంటి ప్రదేశాలను సందర్శించవచ్చు.

ఆరవ రోజు తిరుచిరాపల్లి చేరుకుని శ్రీరంగనాథస్వామి ఆలయాన్ని దర్శించుకుంటారు. అనంతరం తంజావూరులోని బృహదీశ్వర ఆలయం దర్శనం ఉంటుంది.

ఏడో రోజు చిదంబరం చేరుకుని ప్రసిద్ధ నటరాజ స్వామి ఆలయాన్ని దర్శించుకుంటారు. అదే రోజు రాత్రి సికింద్రాబాద్‌కు తిరుగు ప్రయాణం ప్రారంభమవుతుంది.

ఎనిమిదో రోజు రాత్రి సికింద్రాబాద్ చేరుకోవడంతో యాత్ర ముగుస్తుంది.ప్యాకేజీ ఛార్జీలు

ఎకానమీ (స్లీపర్ క్లాస్):
టికెట్ ధర రూ.14,500. 5–11 ఏళ్ల పిల్లలకు రూ.13,500. నాన్-ఏసీ గదులు, నాన్-ఏసీ వాహనాల్లో ప్రయాణం ఉంటుంది.

స్టాండర్డ్ (3AC):
పెద్దలకు రూ.21,700, పిల్లలకు రూ.20,600. ఏసీ గదుల్లో బస ఏర్పాటు ఉంటుంది.

కంఫర్ట్ (2AC):
పెద్దలకు రూ.27,900, పిల్లలకు రూ.26,600. ఏసీ గదుల్లో బస ఉంటుంది.

ప్యాకేజీలో ఉండే సదుపాయాలు

ప్రయాణికులకు ఉదయం టీ, అల్పాహారం, మధ్యాహ్నం భోజనం, రాత్రి భోజనం (శాకాహారం) అందిస్తారు. యాత్రకు అవసరమైన వాహన సౌకర్యం, ట్రావెల్ ఇన్సూరెన్స్ కూడా ఉంటుంది. అవసరమైన సహాయం కోసం ఐఆర్‌సీటీసీ టూర్ మేనేజర్లు అందుబాటులో ఉంటారు.

పర్యాటక ప్రదేశాల్లో ఉండే ప్రవేశ రుసుములు, అదనపు సదుపాయాల ఖర్చులు మాత్రం యాత్రికులే భరించాలి.

క్యాన్సిలేషన్ పాలసీ

ప్రయాణానికి 15 రోజుల ముందు టికెట్ రద్దు చేస్తే రూ.250 క్యాన్సిలేషన్ ఛార్జీ ఉంటుంది.
8–14 రోజుల ముందు రద్దు చేస్తే 25%,
4–7 రోజుల ముందు రద్దు చేస్తే 50% టికెట్ మొత్తాన్ని మినహాయిస్తారు.
ప్రయాణానికి నాలుగు రోజుల ముందు రద్దు చేస్తే రిఫండ్ ఉండదు.