బద్రీనాథ్‌ ఆలయ విరాళాల అవకతవకలపై విచారణ.. ముగ్గురు సభ్యుల కమిటీ ఏర్పాటు

ఆరోపణలపై ఉత్తరాఖండ్‌ ప్రభుత్వం చర్యలకు దిగింది. విరాళాల లెక్కలు, నగదు నిర్వహణలో పారదర్శకతపై ప్రశ్నలు తలెత్తడంతో ఈ వ్యవహారంపై సమగ్ర విచారణకు ఆదేశించింది.

ముఖ్యమంత్రి పుష్కర్‌ సింగ్‌ ధామి ఆదేశాల మేరకు ప్రభుత్వం ముగ్గురు సభ్యులతో కూడిన ఉన్నత స్థాయి కమిటీని ఏర్పాటు చేసింది. ఆలయ విరాళాల సేకరణ, భద్రపరచడం, లెక్కింపు ప్రక్రియల్లో ఎక్కడైనా లోపాలు జరిగాయా అనే అంశాలను ఈ కమిటీ పరిశీలించనుంది.

బద్రీనాథ్‌ కేదార్‌నాథ్‌ టెంపుల్‌ కమిటీ (బీకేటీసీ) పరిధిలో ఉన్న ఆలయాల నిర్వహణపై కూడా కమిటీ దృష్టి సారించనుంది. విచారణ అనంతరం భవిష్యత్‌లో ఇలాంటి ఘటనలు పునరావృతం కాకుండా తీసుకోవాల్సిన సంస్కరణలపై ప్రభుత్వానికి నివేదిక అందించనుంది.

బీకేటీసీ ప్రస్తుతం బద్రీనాథ్‌ ఆలయంతో పాటు ఉత్తరాఖండ్‌లోని మరో 44 ఆలయాలు, పలు విద్యాసంస్థలు, ధర్మశాలల నిర్వహణ బాధ్యతలు చూస్తోంది. దీంతో విరాళాల నిర్వహణ వ్యవస్థలో మరింత పటిష్ఠమైన విధానాలు అమలు చేయాలని ప్రభుత్వం భావిస్తోంది.

విరాళాల నిధుల్లో అవకతవకలు జరిగాయా అనే విషయాన్ని తేల్చేందుకు అధికారులు ఆలయ ప్రాంగణంలోని సీసీటీవీ కెమెరాల దృశ్యాలను పరిశీలిస్తున్నారు. అలాగే ఇప్పటివరకు వచ్చిన విరాళాల రికార్డులు, నగదు లావాదేవీలు, విరాళాల సేకరణ విధానం, లెక్కింపు ప్రక్రియ, సంబంధిత పత్రాలను అధికారులు తనిఖీ చేస్తున్నారు.

ఆలయ కమిటీలోని పరిపాలనా లోపాలు, పర్యవేక్షణ సమస్యలను గుర్తించి వాటిని సరిదిద్దేందుకు చర్యలు తీసుకుంటున్నట్లు అధికారులు తెలిపారు. భక్తుల విశ్వాసానికి సంబంధించిన అంశం కావడంతో విచారణను పారదర్శకంగా నిర్వహించాలని ప్రభుత్వం సూచించింది.

మరోవైపు బీకేటీసీ కూడా ఈ వ్యవహారంపై అంతర్గత విచారణ ప్రారంభించింది. విరాళాల నిర్వహణలో అక్రమాలకు పాల్పడినట్లు ప్రాథమిక ఆధారాలు లభించడంతో ప్రమోద్‌ నౌట్యాల్‌ అనే ఉద్యోగిని సస్పెండ్‌ చేసినట్లు బీకేటీసీ ఛైర్మన్‌ హేమంత్‌ ద్వివేది తెలిపారు.

విచారణ పూర్తయిన తర్వాత బాధ్యులపై చర్యలు తీసుకోవడంతో పాటు ఆలయ విరాళాల నిర్వహణలో మరిన్ని భద్రతా, పర్యవేక్షణ చర్యలు అమలు చేసే అవకాశం ఉందని అధికారులు వెల్లడించారు