ఫెడ్‌ సమీక్ష ప్యానెల్‌లో రఘురామ్‌రాజన్‌కు చోటు.. కీలక బాధ్యతల్లో భారతీయ ఆర్థికవేత్త

అమెరికా కేంద్ర బ్యాంక్‌ ఫెడరల్‌ రిజర్వ్‌ (ఫెడ్‌) విధానాలపై సమీక్ష నిర్వహించేందుకు ఏర్పాటు చేసిన ప్రత్యేక ప్యానెళ్లలో రిజర్వ్‌ బ్యాంక్‌ ఆఫ్‌ ఇండియా (ఆర్‌బీఐ) మాజీ గవర్నర్‌ రఘురామ్‌రాజన్‌కు కీలక స్థానం లభించింది. ప్రపంచ ఆర్థిక రంగంలో విశేష అనుభవం ఉన్న నిపుణులతో ఈ ప్యానెళ్లను ఏర్పాటు చేయగా, అందులో రఘురామ్‌రాజన్‌ కూడా సభ్యుడిగా నియమితులయ్యారు.

ఫెడ్‌ తన ద్రవ్య విధానాలు, నిర్ణయ ప్రక్రియ, నిర్వహణ విధానాలను మరింత సమర్థవంతంగా మార్చేందుకు ఈ సమీక్ష చేపడుతోంది. వడ్డీ రేట్ల నిర్ణయాలు, ఆర్థిక స్థిరత్వం, సంస్థ పనితీరు, తీసుకునే నిర్ణయాల ప్రభావాలను ఈ ప్యానెళ్లు పరిశీలించనున్నాయి.

రఘురామ్‌రాజన్‌తో పాటు భారత సంతతికి చెందిన అమెరికా ఆర్థికవేత్త రాజ్‌ శెట్టి, మైక్రోసాఫ్ట్‌ సీనియర్‌ ఎగ్జిక్యూటివ్‌ ఆశా శర్మ కూడా ఈ బృందాల్లో చోటు దక్కించుకున్నారు. అంతర్జాతీయ ఆర్థిక వ్యవస్థపై అవగాహన ఉన్న పలువురు ప్రముఖులను ఇందులో భాగం చేశారు.

ఫెడరల్‌ రిజర్వ్‌ ఛైర్మన్‌ కెవిన్‌ వార్ష్‌ ప్రకటించిన ఐదు టాస్క్‌ఫోర్స్‌లలో బ్యాంక్‌ ఆఫ్‌ ఇంగ్లండ్‌ మాజీ గవర్నర్‌ మెర్విన్‌ కింగ్‌, వాల్‌మార్ట్‌ మాజీ సీఈఓ డగ్‌ మెక్‌మిలన్‌, నోబెల్‌ బహుమతి గ్రహీత థామస్‌ సార్జెంట్‌, సిలికాన్‌ వ్యాలీ వెంచర్‌ క్యాపిటలిస్ట్‌ మార్క్‌ ఆండ్రసన్‌ వంటి ప్రముఖులు కూడా ఉన్నారు.

ఈ ఐదు ప్యానెళ్లకు ఫెడరల్‌ రిజర్వ్‌ సిబ్బంది సాంకేతిక, పరిశోధన సహకారం అందించనున్నారు. అయితే, ప్యానెళ్లు స్వతంత్రంగా పనిచేసి తమ పరిశీలనలను అందించాల్సి ఉంటుంది. ఫెడ్‌ కార్యకలాపాల్లో ఖర్చులు, వాటి ప్రయోజనాలు, విధానాల ప్రభావం వంటి అంశాలపై సమగ్రంగా అధ్యయనం చేయనున్నాయి.

ప్రపంచవ్యాప్తంగా కేంద్ర బ్యాంకుల పనితీరుపై చర్చ జరుగుతున్న సమయంలో ఈ సమీక్షకు ప్రాధాన్యం పెరిగింది. ముఖ్యంగా ద్రవ్యోల్బణ నియంత్రణ, వడ్డీ రేట్ల నిర్వహణ, ఆర్థిక వృద్ధి మధ్య సమతుల్యత సాధించే విషయంలో ఫెడరల్‌ రిజర్వ్‌ తీసుకునే నిర్ణయాలు అంతర్జాతీయ మార్కెట్లపై ప్రభావం చూపుతాయి.

ఆర్‌బీఐ గవర్నర్‌గా పనిచేసిన రఘురామ్‌రాజన్‌ అంతర్జాతీయ ఆర్థిక విధానాలపై ఉన్న అనుభవం కారణంగా ఈ ప్యానెల్‌లో ఆయన పాత్ర కీలకంగా మారుతుందని ఆర్థిక నిపుణులు భావిస్తున్నారు. అంతర్జాతీయ ద్రవ్య విధానాలపై ఆయనకు ఉన్న అవగాహన ఫెడ్‌ సమీక్షలో ఉపయోగపడుతుందని అంచనా వేస్తున్నారు.