సిబిల్‌ స్కోరు నుంచి బ్యాంక్‌ స్టేట్‌మెంట్‌ వరకు.. పే స్లిప్‌కు బదులుగా ఇవి

పే స్లిప్‌ లేకపోయినా వ్యక్తిగత రుణం పొందే అవకాశం ఉంది. సాధారణంగా పర్సనల్‌ లోన్‌ కోసం ఆదాయ రుజువు, పాన్‌ కార్డు, క్రెడిట్‌ హిస్టరీ, క్రెడిట్‌ స్కోరు, పే స్లిప్‌ వంటి పత్రాలను రుణ సంస్థలు అడుగుతాయి. అయితే ఫ్రీలాన్సర్లు, వ్యాపారులు, కాంట్రాక్టర్లు, గిగ్‌ వర్కర్లు, స్వయం ఉపాధి పొందేవారి ఆదాయ విధానం భిన్నంగా ఉంటుంది. అందుకే కొన్ని రుణ సంస్థలు పే స్లిప్‌కు బదులుగా ఇతర ఆర్థిక ఆధారాలను పరిశీలిస్తున్నాయి.

ఐటీఆర్‌ కీలక ఆధారం:

పే స్లిప్‌ లేకపోతే ఆదాయపు పన్ను రిటర్న్‌ (ITR) మంచి ప్రత్యామ్నాయంగా ఉపయోగపడుతుంది. గత కొన్నేళ్ల ఐటీఆర్‌ పత్రాలు సమర్పించడం ద్వారా మీ ఆదాయాన్ని రుణ సంస్థకు తెలియజేయవచ్చు. స్వయం ఉపాధి పొందేవారు చార్టర్డ్‌ అకౌంటెంట్‌ ధ్రువీకరించిన ఆదాయ వివరాలను కూడా సమర్పించవచ్చు.

క్రెడిట్‌ స్కోరు ముఖ్యం:

పే స్లిప్‌ లేని సమయంలో మీ క్రెడిట్‌ చరిత్రకు మరింత ప్రాధాన్యం ఉండొచ్చు. సాధారణంగా 750 లేదా అంతకంటే ఎక్కువ క్రెడిట్‌ స్కోరు ఉంటే రుణ అర్హత మెరుగుపడే అవకాశం ఉంటుంది. అయితే రుణ మంజూరు పూర్తిగా రుణ సంస్థ నిబంధనలు, ఆదాయం, ఇతర అర్హతలపై ఆధారపడి ఉంటుంది. గతంలో తీసుకున్న రుణాలు, క్రెడిట్‌ కార్డు బకాయిలను సకాలంలో చెల్లించడం కూడా కీలకమే.

బ్యాంకు స్టేట్‌మెంట్లు ఉపయోగపడతాయి:

గత 6-12 నెలల బ్యాంకు ఖాతా స్టేట్‌మెంట్లు మీ ఆదాయం, నగదు ప్రవాహాన్ని అంచనా వేయడానికి రుణ సంస్థలకు ఉపయోగపడవచ్చు. క్రమం తప్పకుండా ఆదాయం జమ కావడం, ఆర్థిక లావాదేవీలు సక్రమంగా ఉండటం మీ రుణ దరఖాస్తుకు ఉపయోగపడే అంశాలుగా మారవచ్చు.

వ్యాపారులకు అదనపు ఆధారాలు :

మీరు వ్యాపారం నిర్వహిస్తుంటే జీఎస్‌టీ రిజిస్ట్రేషన్‌, వ్యాపార నమోదు పత్రాలు, షాప్‌ అండ్‌ ఎస్టాబ్లిష్‌మెంట్‌ సర్టిఫికెట్‌ వంటి పత్రాలు ఆదాయ వనరును నిరూపించడంలో సహాయపడవచ్చు. వ్యాపారం ఎంతకాలంగా కొనసాగుతోందన్న అంశాన్ని కూడా కొన్ని రుణ సంస్థలు పరిగణనలోకి తీసుకుంటాయి.

బ్యాంకుతో పాత సంబంధం కూడా ప్లస్‌:

మీకు ఇప్పటికే ఏదైనా బ్యాంకులో పొదుపు లేదా కరెంట్‌ ఖాతా ఉండి, లావాదేవీలు సక్రమంగా కొనసాగిస్తుంటే అది కూడా రుణ దరఖాస్తు పరిశీలనలో ఉపయోగపడవచ్చు. గత రుణాలు లేదా క్రెడిట్‌ కార్డు బకాయిలను సమయానికి చెల్లించిన చరిత్ర ఉంటే అదనపు ప్రయోజనం కలగవచ్చు.

అయితే పే స్లిప్‌ లేకపోవడం వల్ల ప్రతి బ్యాంకు లేదా రుణ సంస్థ తప్పనిసరిగా రుణం మంజూరు చేస్తుందనే హామీ లేదు. వడ్డీ రేటు, రుణ మొత్తం, ప్రాసెసింగ్‌ ఫీజు, ఇతర నిబంధనలను పరిశీలించిన తర్వాతే దరఖాస్తు చేయడం మంచిది.