డార్లింగ్ కామెంట్స్‌తో సోషల్ మీడియాలో ట్రెండ్!!

అందరూ తనను మాస్‌, యాక్షన్‌ హీరోగానే చూస్తున్నా… తన మనసులో మాత్రం ప్రేమకథలకు ప్రత్యేక స్థానం ఉందని అగ్ర కథానాయకుడు ప్రభాస్ వెల్లడించారు. ఇటీవల విడుదలైన ‘కపుల్‌ ఫ్రెండ్లీ’ సినిమా చూసిన తర్వాత నిజంగానే ప్రేమలో పడాలనిపించిందని ఆయన చెప్పడం అభిమానుల్లో ఆసక్తి రేపుతోంది. సంతోష్‌ శోభన్‌ హీరోగా నటించిన ఈ చిత్రబృందంతో కలిసి జరిగిన ప్రత్యేక ఇంటర్వ్యూలో పాల్గొన్న ప్రభాస్‌, తన వ్యక్తిగత అభిరుచులు, సినిమాలపై ఉన్న ప్రేమ గురించి ఓపెన్‌గా మాట్లాడారు. “యాక్షన్‌ సినిమాలు ఎంత చేసినా… ప్రేమకథలు చూసేటప్పుడు కలిగే ఫీల్‌ వేరు” అని ఆయన చెప్పడం విశేషం.

ప్రేమకథలంటే ఎందుకింత ఇష్టం?

ప్రభాస్‌ మాట్లాడుతూ… తనకు ‘ గీతాంజలి’ సినిమా అంటే అమితమైన ఇష్టమని, ఆ చిత్రాన్ని ఎన్నిసార్లు చూసినా బోర్‌ అనిపించదని చెప్పారు. అలాగే ‘ఏమాయచేసావే‘ చూసినప్పుడూ మనసు మృదువైపోతుందని తెలిపారు. “ఆ సినిమాలు చూసినప్పుడు నిజంగానే ప్రేమలో పడాలనిపించింది. అదే అనుభూతి ‘కపుల్‌ ఫ్రెండ్లీ’ చూసినప్పుడు కూడా కలిగింది” అని చెప్పారు. యాక్షన్‌ ఇమేజ్‌ ఉన్నప్పటికీ, తనలోని రొమాంటిక్‌ కోణాన్ని అభిమానులు కూడా గుర్తించాలని ఆయన చమత్కరించారు.

ఫుడ్‌ లవర్‌గా ప్రభాస్‌!

ఇంటర్వ్యూలో ప్రభాస్‌ ఆహారపు అలవాట్ల గురించి కూడా చర్చ జరిగింది. ఇతర రాష్ట్రాల నుంచి ప్రత్యేకంగా ఫుడ్‌ ఆర్డర్‌ పెట్టడం తనకు అలవాటని చెప్పారు.’ ఆదిపురుష్ ‘ సినిమా షూటింగ్‌ సందర్భంగా ముంబయిలో జరిగిన ఓ సంఘటనను గుర్తుచేసుకుంటూ… “చెన్నై వంటకాలు తెప్పిస్తానని చెప్పా. అందరూ స్థానికంగానే తయారు చేయిస్తానని అనుకున్నారు. కానీ నేను చెన్నైలోనే తయారు చేయించి ఫ్లైట్‌లో ఫుడ్‌ తెప్పించాను. అది తెలిసి సెట్‌లో ఉన్నవాళ్లంతా ఆశ్చర్యపోయారు” అని నవ్వుతూ చెప్పారు. ప్రభాస్‌కి ఫుడ్‌పై ఉన్న ప్రేమ, తనతో పని చేసే వారికి కూడా ప్రత్యేక అనుభవాల్ని అందిస్తుందని చిత్రబృందం పేర్కొంది.

యాక్షన్‌ స్టార్‌లో రొమాంటిక్‌ హార్ట్‌

బాహుబలి వంటి భారీ యాక్షన్‌ చిత్రాలతో ప్రపంచవ్యాప్తంగా గుర్తింపు తెచ్చుకున్న ప్రభాస్‌, తన మనసులో ప్రేమకథలకు ఉన్న స్థానం గురించి ఇలా మాట్లాడడం అభిమానులను ఆకట్టుకుంది. మొత్తానికి… యాక్షన్‌ హీరోగా మెరిసే ప్రభాస్‌ హృదయంలో మాత్రం ఒక రొమాంటిక్‌ హీరో దాగి ఉన్నాడని ఈ ఇంటర్వ్యూ స్పష్టంచేసింది