ఖమేనీ మరణ వార్తతో ప్రపంచం ఉద్రిక్తం… అనేక దేశాల్లో ఆందోళనలు

ఖమేనీ మరణ వార్త వెలుగులోకి వచ్చిన వెంటనే పలు దేశాల్లో భావోద్వేగాలు ఉప్పొంగాయి. ముఖ్యంగా మధ్యప్రాచ్య దేశాల్లో భద్రతా పరిస్థితులు అత్యంత సున్నితంగా మారాయి. అమెరికా, ఇజ్రాయెల్ దేశాలను లక్ష్యంగా చేసుకొని నిరసనకారులు నినాదాలు చేస్తూ వీధుల్లోకి వచ్చారు. కొన్ని చోట్ల పరిస్థితులు అదుపు తప్పి హింసాత్మక ఘర్షణలకు దారితీశాయి.

పాకిస్థాన్‌లో కరాచీ నగరంలో అమెరికా కాన్సులేట్‌ వద్ద ఉద్రిక్తతలు నెలకొనడంతో భారీగా పోలీసులు మోహరించారు. నిరసనకారులు బ్యారికేడ్లు తొలగించే ప్రయత్నం చేయడంతో పోలీసులు వారిని చెదరగొట్టేందుకు లాఠీచార్జ్, బాష్పవాయువు ప్రయోగించినట్లు సమాచారం. ఈ ఘటనల్లో ప్రాణనష్టం సంభవించడం ఆందోళనకర పరిణామంగా మారింది.

గ్రీస్ రాజధాని ఏథెన్స్‌లో వేలాది మంది ప్రజలు ర్యాలీలు నిర్వహించారు. అమెరికా, ఇజ్రాయెల్ రాయబార కార్యాలయాల వైపు ముట్టడి యత్నాలు చేయడంతో భద్రతా దళాలు అప్రమత్తమయ్యాయి. ఇరాక్ రాజధాని బాగ్దాద్‌లోనూ పరిస్థితులు ఉద్రిక్తంగా మారాయి. అక్కడ నిరసనకారులు రాళ్లు రువ్వడంతో భద్రతా దళాలు బాష్పవాయువు ప్రయోగించి పరిస్థితిని అదుపులోకి తీసుకువచ్చాయి.

భారత్‌లో జమ్మూకశ్మీర్‌లోని పలు ప్రాంతాల్లో భారీ ర్యాలీలు నిర్వహించారు. లాల్‌చౌక్, బుడ్గాం, అనంతనాగ్, పుల్వామా వంటి ప్రాంతాల్లో పెద్దఎత్తున ప్రజలు సంతాపం వ్యక్తం చేశారు. ఉత్తర్‌ప్రదేశ్, పంజాబ్, కర్ణాటక రాష్ట్రాల్లోనూ ముస్లిం సంఘాలు సంతాప సభలు నిర్వహించాయి. కొన్ని చోట్ల సోమవారం మరిన్ని ర్యాలీలు నిర్వహిస్తామని ప్రకటించారు.

జమ్మూకశ్మీర్ ముఖ్యమంత్రి ఒమర్ అబ్దుల్లా ప్రజలు శాంతియుతంగా నిరసనలు చేపట్టాలని, చట్టాన్ని గౌరవించాలని పిలుపునిచ్చారు. కర్ణాటకలోని చిక్కబల్లాపుర్ జిల్లా అలిపురా గ్రామంలో విషాద వాతావరణం నెలకొంది. ఖమేనీ గతంలో తమ గ్రామాన్ని సందర్శించారని పేర్కొంటూ మూడు రోజులపాటు వేడుకలను నిలిపివేస్తున్నట్లు గ్రామస్థులు తెలిపారు. భారత్‌లోని ఇరాన్ ఎంబసీ ఖమేనీ హత్యను ప్రపంచ దేశాలు ఖండించాలని కోరింది. ఈ పరిణామాలతో అంతర్జాతీయ రాజకీయ వాతావరణం మరింత సంక్లిష్టంగా మారింది. భవిష్యత్తులో పరిస్థితులు ఎలా మారుతాయన్న దానిపై ప్రపంచ దేశాలు అప్రమత్తంగా గమనిస్తున్నాయి.