దుబాయ్ ఎయిర్‌పోర్టు సమీపంలో డ్రోన్ దాడి

పశ్చిమాసియాలో కొనసాగుతున్న ఉద్రిక్త పరిస్థితులు మరింత తీవ్రమవుతున్న నేపథ్యంలో ఇరాన్ పలు దేశాలపై డ్రోన్ దాడులను పెంచుతున్నట్లు సమాచారం. తాజాగా దుబాయ్ అంతర్జాతీయ విమానాశ్రయం సమీపంలో డ్రోన్ల ద్వారా దాడులు జరిగినట్లు స్థానిక అధికారులు వెల్లడించారు. ఈ ఘటనతో అక్కడ ఒక్కసారిగా భయాందోళన వాతావరణం నెలకొంది.

ఈ దాడుల్లో నలుగురు వ్యక్తులు గాయపడినట్లు అధికారులు తెలిపారు. గాయపడిన వారిలో ఒకరు భారతీయుడు కూడా ఉన్నట్లు సమాచారం. క్షతగాత్రులను సమీప ఆసుపత్రికి తరలించి చికిత్స అందిస్తున్నట్లు అధికారులు వెల్లడించారు. ఈ ఘటనపై భద్రతా సంస్థలు వెంటనే అప్రమత్తమై పరిసర ప్రాంతాల్లో తనిఖీలు చేపట్టాయి. డ్రోన్ దాడుల అనంతరం విమానాశ్రయం పరిసర ప్రాంతాల్లో పొగ కమ్ముకున్నట్లు స్థానికులు తెలిపారు. ఈ ఘటనకు సంబంధించిన వీడియోలు, చిత్రాలు సోషల్ మీడియాలో విస్తృతంగా వైరల్ అవుతున్నాయి. విమానాశ్రయం సమీపంలో జరిగిన ఈ ఘటనతో ప్రయాణికులు, సిబ్బంది కొంతసేపు ఆందోళనకు గురయ్యారు.

ప్రపంచంలో అత్యంత రద్దీగా ఉండే అంతర్జాతీయ విమానాశ్రయాల్లో దుబాయ్ విమానాశ్రయం ఒకటి. ఇక్కడి నుంచి రోజూ వందలాది అంతర్జాతీయ, దేశీయ విమానాలు రాకపోకలు సాగిస్తుంటాయి. డ్రోన్ దాడుల నేపథ్యంలో భద్రతా చర్యలను అధికారులు మరింత కట్టుదిట్టం చేసినట్లు సమాచారం.

మరోవైపు ఇప్పటికే షెడ్యూల్‌ చేసిన కొన్ని విమాన సర్వీసులు కొనసాగుతున్నప్పటికీ, భద్రతా కారణాల వల్ల కొన్ని విమానాల రాకపోకల్లో ఆలస్యాలు చోటుచేసుకున్నట్లు తెలుస్తోంది. పరిస్థితిని అధికారులు నిరంతరం పర్యవేక్షిస్తూ ప్రయాణికుల భద్రతకు ప్రాధాన్యత ఇస్తున్నట్లు వెల్లడించారు. పశ్చిమాసియాలో కొనసాగుతున్న రాజకీయ ఉద్రిక్తతల ప్రభావం అంతర్జాతీయ రవాణా వ్యవస్థపై కూడా పడుతున్నట్లు నిపుణులు చెబుతున్నారు. ఈ పరిణామాలను ప్రపంచ దేశాలు గమనిస్తూ పరిస్థితిని సమీక్షిస్తున్నాయి.