ఆ దర్శకుడి ఫెయిల్యూర్ కోసం ఇండస్ట్రీ ఎదురు చూస్తోందా? వర్మ షాకింగ్ కామెంట్స్!!

వివాదాస్పద వ్యాఖ్యలతో తరచూ వార్తల్లో నిలిచే దర్శకుడు రామ్‌ గోపాల్‌ వర్మ మరోసారి ఆసక్తికర వ్యాఖ్యలు చేశారు. తాజాగా ఓ ఇంటర్వ్యూలో మాట్లాడిన వర్మ, దర్శకుడు ఆదిత్య ధర్ తెరకెక్కించిన ‘ధురంధర్’ చిత్రంపై ప్రశంసలు కురిపిస్తూ, అదే సమయంలో ఇండస్ట్రీలోని భావజాలాన్ని తన శైలిలో వెల్లడించారు.

వర్మ మాట్లాడుతూ, ‘ధురంధర్’ సినిమా భారతీయ చిత్ర పరిశ్రమలో కొత్త మార్పులకు నాంది పలికిందన్నారు. ఈ సినిమా మేకింగ్‌, విజువల్ స్టైల్‌, కథ చెప్పే విధానం మొత్తం ఇండస్ట్రీలోని దర్శకులకు కొత్త ప్రమాణాలు సెట్ చేసిందని పేర్కొన్నారు. ముఖ్యంగా యాక్షన్ సినిమాల నిర్మాణంలో ఈ చిత్రం భారీ ప్రభావం చూపిందని చెప్పారు.

ఈ సినిమా విడుదలైన తర్వాత అనేక దర్శకులు తమ సినిమాల మేకింగ్‌ను తిరిగి పరిశీలించుకోవాల్సిన పరిస్థితి ఏర్పడిందని వర్మ వ్యాఖ్యానించారు. ముఖ్యంగా కొన్ని భారీ బడ్జెట్ యాక్షన్ సినిమాలు ‘ధురంధర్’ స్థాయి మేకింగ్ అందుకోవడానికి రీ-షూట్స్ కూడా చేస్తున్నాయని ఆయన తెలిపారు. దీంతో నిర్మాతలపై అదనపు ఆర్థిక భారం పడుతోందని అన్నారు.

వర్మ మాటల్లో, “చాలా మంది దర్శకులు తమ కంఫర్ట్ జోన్‌లో ఉండి పాత పద్ధతుల్లోనే సినిమాలు తీస్తుంటారు. కానీ ఆదిత్య ధర్ ఆ పరిస్థితిని మార్చేశారు. ఆయన మేకింగ్‌ చూసి ఇప్పుడు చాలా మంది దర్శకులు కొత్తగా ఆలోచించాల్సిన పరిస్థితి వచ్చింది” అని చెప్పారు.

ఇంకా ఆయన ఆసక్తికరంగా మాట్లాడుతూ, “ఆదిత్య ధర్‌, యామీ గౌతమ్ ఇప్పుడు చాలా జాగ్రత్తగా ఉండాలి. ఎందుకంటే ఇండస్ట్రీలో చాలా మంది వారు ఎప్పుడు ఫెయిల్ అవుతారా అని ఎదురుచూస్తున్నారు” అని వ్యాఖ్యానించారు.

ఇక ‘ధురంధర్’ విజయానికి కొనసాగింపుగా రూపొందిన ‘ధురంధర్ 2’ చిత్రం మార్చి 19న విడుదలకు సిద్ధమవుతోంది. ఈ సీక్వెల్‌పై ప్రేక్షకుల్లో భారీ ఆసక్తి నెలకొంది. ఇండస్ట్రీలో ఇప్పటికే పెద్ద చర్చకు దారితీసిన ఈ చిత్రం విడుదల తర్వాత ఎలాంటి ప్రభావం చూపుతుందో చూడాలి.