ఈ ఏడాది చివర్లో ‘ధురంధర్’ సర్‌ప్రైజ్‌.. నిర్మాత కీలక ప్రకటన

యాక్షన్ థ్రిల్లర్ ‘ధురంధర్’పై ప్రేక్షకుల్లో ఆసక్తి ఇంకా తగ్గలేదు. రణ్‌వీర్ సింగ్ ప్రధాన పాత్రలో, ఆదిత్య ధర్ దర్శకత్వంలో రూపొందిన ఈ సినిమా ఇప్పటికే బాక్సాఫీస్ వద్ద మంచి విజయాన్ని సాధించిన విషయం తెలిసిందే. అయితే ఇప్పుడు ఈ సినిమాకు సంబంధించిన మరో పెద్ద అప్‌డేట్‌తో నిర్మాత జ్యోతి దేశ్‌పాండే వార్తల్లో నిలిచారు.

తాజాగా ఇచ్చిన ఇంటర్వ్యూలో ఆమె మాట్లాడుతూ “‘ధురంధర్’ ఇంకా పూర్తిగా ముగియలేదు. ఈ ఏడాది చివర్లో ప్రేక్షకులకు ఒక ప్రత్యేకమైన సర్‌ప్రైజ్ ఇవ్వబోతున్నాం. మా దగ్గర చాలా ఆసక్తికరమైన ప్లాన్ సిద్ధంగా ఉంది” అని వెల్లడించారు. ఈ వ్యాఖ్యలు ఇప్పుడు సోషల్ మీడియాలో పెద్ద చర్చకు దారితీస్తున్నాయి.

సినిమా నిర్మాణ సమయంలో ఎదురైన అనుభవాలను కూడా ఆమె పంచుకున్నారు. “ఈ సినిమా చేయాల్సిన సమయంలో మాకు పెద్ద హిట్ అవసరం ఉండేది. ఆ సమయంలో నేను, ఆదిత్య ధర్, రణ్‌వీర్ సింగ్ చాలా దగ్గరయ్యాం. షూటింగ్ సమయంలో వచ్చిన సవాళ్లు మా టీమ్‌ను మరింత బలంగా మార్చాయి” అని తెలిపారు.

ఈ వ్యాఖ్యలతో అభిమానుల్లో ఆసక్తి మరింత పెరిగింది. ఆ సర్‌ప్రైజ్ ఏమై ఉంటుందన్నదానిపై అనేక ఊహాగానాలు మొదలయ్యాయి. కొందరు ఇది మేకింగ్ డాక్యుమెంటరీ కావచ్చని భావిస్తుండగా, మరికొందరు సినిమా సీక్వెల్ లేదా ప్రత్యేక ఎక్స్‌టెండెడ్ కంటెంట్ కావచ్చని అంచనా వేస్తున్నారు.

అయితే అసలు విషయం ఏంటో తెలుసుకోవాలంటే ఈ ఏడాది చివరి వరకు వేచి చూడాల్సిందే.