ముంబయి ఇండియన్స్‌కు సూర్యకుమార్ గుడ్‌బై చెప్పనున్నాడా?

టీమ్ఇండియా స్టార్ బ్యాటర్ సూర్యకుమార్ యాదవ్ ప్రస్తుతం కఠినమైన పరిస్థితిని ఎదుర్కొంటున్నాడు. కొంతకాలంగా అతని ఫామ్ పూర్తిగా తగ్గిపోవడంతో జట్టులో స్థానం నిలబెట్టుకోవడం కష్టంగా మారింది. భారత టీ20 జట్టుకు కెప్టెన్‌గా ఉన్న అతడిని ఇటీవల ఆ బాధ్యతల నుంచి తప్పించడమే కాకుండా జట్టులోనూ చోటు కల్పించలేదని వార్తలు వినిపిస్తున్నాయి. యువ ఆటగాళ్ల నుంచి పెరుగుతున్న పోటీతో తిరిగి జాతీయ జట్టులోకి రావాలంటే సూర్య మరింత శ్రమించాల్సిన పరిస్థితి నెలకొంది.

ఈ నేపథ్యంలో అతని ఐపీఎల్ భవిష్యత్తుపై కూడా అనేక ఊహాగానాలు మొదలయ్యాయి. చాలాకాలంగా ముంబయి ఇండియన్స్‌కు కీలక ఆటగాడిగా ఉన్న సూర్యకుమార్ యాదవ్, వచ్చే సీజన్‌లో ఆ ఫ్రాంచైజీకి గుడ్‌బై చెప్పే అవకాశాలు ఉన్నట్లు చర్చ జరుగుతోంది. గత సీజన్‌లో అతను కేవలం 270 పరుగులు మాత్రమే చేయడంతో అభిమానులను నిరాశపరిచాడు. మరోవైపు ముంబయి ఇండియన్స్ జట్టు కూడా ఇటీవల తమ స్థాయికి తగ్గ ప్రదర్శన చేయలేకపోతోంది. దీంతో జట్టులో పెద్ద మార్పులు జరగవచ్చని అంచనాలు వినిపిస్తున్నాయి.

ఇక సూర్యకుమార్ యాదవ్ సోషల్ మీడియా చర్యలు ఈ ఊహాగానాలకు మరింత బలం చేకూర్చాయి. అతను ఇన్‌స్టాగ్రామ్‌లో ముంబయి ఇండియన్స్‌ను ఫాలో చేయకపోవడం చర్చనీయాంశంగా మారింది. అంతేకాకుండా ఆ ఫ్రాంచైజీకి సంబంధించిన వందకు పైగా పోస్టులను డిలీట్ చేసినట్లు తెలుస్తోంది. ప్రస్తుతం అతని ప్రొఫైల్‌లో ముంబయి ఇండియన్స్‌కు సంబంధించిన ఒక్క ఫోటో మాత్రమే మిగిలి ఉంది.

ఆ ఫోటోలో రోహిత్ శర్మ, మహేంద్ర సింగ్ ధోనీతో కలిసి ఉన్న చిత్రం కనిపిస్తోంది. దీంతో సూర్య ముంబయి ఇండియన్స్‌ను వీడనున్నాడన్న ప్రచారం మరింత వేగం పుంజుకుంది. అదే సమయంలో అతను హార్దిక్ పాండ్యాను కూడా అన్‌ఫాలో చేయడం గమనార్హం. మరోవైపు హార్దిక్ పాండ్యాను కూడా ముంబయి ఇండియన్స్ జట్టు వదులుకునే అవకాశాలపై గత కొంతకాలంగా ఊహాగానాలు కొనసాగుతున్నాయి.