జిమ్‌లో గాయపడిన హిమాన్షు.. ఆసుపత్రికి వెళ్లి పరామర్శించిన కేసీఆర్‌

జిమ్‌లో వర్కవుట్స్‌ చేస్తూ గాయపడిన భారాస కార్యనిర్వాహక అధ్యక్షుడు కేటీఆర్‌ తనయుడు హిమాన్షు ఆరోగ్య పరిస్థితిని మాజీ ముఖ్యమంత్రి కేసీఆర్‌ స్వయంగా తెలుసుకున్నారు. గచ్చిబౌలిలోని ఏఐజీ ఆసుపత్రిలో చికిత్స పొందుతున్న హిమాన్షును మంగళవారం కేసీఆర్‌ పరామర్శించారు.

కేటీఆర్‌, మాజీ మంత్రి హరీశ్‌రావు, ఇతర భారాస నేతలతో కలిసి ఆసుపత్రికి చేరుకున్న కేసీఆర్‌కు ఏఐజీ ఛైర్మన్‌ డాక్టర్‌ నాగేశ్వరరెడ్డి స్వాగతం పలికారు. అనంతరం కేసీఆర్‌ నేరుగా హిమాన్షు చికిత్స పొందుతున్న వార్డుకు వెళ్లి అతడితో మాట్లాడారు. ఆరోగ్య పరిస్థితి, అందుతున్న వైద్యం గురించి వైద్యులను అడిగి తెలుసుకున్నారు.

కొంత సమయం మనవడి వద్ద గడిపిన అనంతరం కేసీఆర్‌ ఆసుపత్రి నుంచి బయటకు వచ్చారు. హిమాన్షు త్వరగా కోలుకోవాలని కుటుంబ సభ్యులు, అభిమానులు ఆకాంక్షిస్తున్నారు.

సోమవారం సాయంత్రం ఇంట్లోని జిమ్‌లో వ్యాయామం చేస్తుండగా హిమాన్షు ప్రమాదవశాత్తు గాయపడ్డారు. వర్కవుట్స్‌ సమయంలో ముక్కుకు గాయం కావడంతో రక్తస్రావం జరిగింది. రక్తస్రావం ఆగకపోవడంతో కుటుంబ సభ్యులు వెంటనే అతడిని గచ్చిబౌలిలోని ఏఐజీ ఆసుపత్రికి తరలించారు.

వైద్యులు పరీక్షలు నిర్వహించి చికిత్స అందిస్తున్నారు. ప్రస్తుతం హిమాన్షు ఆరోగ్య పరిస్థితి నిలకడగా ఉందని కుటుంబ వర్గాలు తెలిపాయి. తన కుమారుడు ఆసుపత్రిలో కోలుకుంటున్నాడని, ప్రస్తుతం ఎలాంటి ఆందోళన అవసరం లేదని కేటీఆర్‌ సామాజిక మాధ్యమం ‘ఎక్స్‌’ వేదికగా వెల్లడించారు.

హిమాన్షు ఆరోగ్యంపై సమాచారం తెలుసుకునేందుకు భారాస నేతలు, అభిమానులు ఆసక్తి చూపిస్తున్నారు. త్వరగా కోలుకోవాలని పలువురు సోషల్‌ మీడియా వేదికగా ఆకాంక్షలు వ్యక్తం చేస్తున్నారు.