తెదేపా ఎన్నారై విభాగం అధ్యక్షుడిగా పి.గురురాజా నియామకం

తెలుగుదేశం పార్టీ ఎన్నారై విభాగాన్ని మరింత బలోపేతం చేసే దిశగా పార్టీ అధిష్ఠానం కీలక నిర్ణయం తీసుకుంది. ఎన్నారై తెదేపా విభాగం జాతీయ అధ్యక్షుడిగా కర్నూలుకు చెందిన పి.గురురాజాను నియమించింది. ఆయనతో పాటు 45 మందితో కూడిన జాతీయ కమిటీని కూడా ఏర్పాటు చేసింది.

ఈ కమిటీలో ముగ్గురిని ప్రధాన కార్యదర్శులుగా, ఐదుగురిని ఉపాధ్యక్షులుగా నియమించారు. 16 మందికి కార్యనిర్వాహక కార్యదర్శుల బాధ్యతలు అప్పగించగా, 17 మందిని కార్యదర్శులుగా నియమించారు. ఇద్దరిని సామాజిక మాధ్యమ ప్రతినిధులుగా, ఒకరిని కోశాధికారిగా నియమిస్తూ పార్టీ నిర్ణయం తీసుకుంది.

ఈ మేరకు తెదేపా రాష్ట్ర అధ్యక్షుడు పల్లా శ్రీనివాసరావు శుక్రవారం అధికారిక ప్రకటన విడుదల చేశారు. పార్టీ కార్యక్రమాలను విదేశాల్లో మరింత విస్తృతంగా తీసుకెళ్లడం, ఎన్నారై కార్యకర్తలను సమన్వయం చేయడం, విదేశాల్లో ఉన్న తెలుగువారితో పార్టీ అనుబంధాన్ని బలోపేతం చేయడం వంటి బాధ్యతలు కొత్త కమిటీపై ఉండనున్నాయి.

పి.గురురాజా కర్నూలు జిల్లాకు చెందినవారు. ప్రస్తుతం అమెరికాలోని టెక్సస్‌ రాష్ట్రం ఒడిస్సా ప్రాంతంలో గైనకాలజిస్టుగా పనిచేస్తున్నారు. గత రెండు దశాబ్దాలుగా ఎన్నారై తెదేపాలో క్రియాశీలకంగా పనిచేస్తూ పార్టీ కార్యక్రమాల్లో భాగస్వామిగా ఉన్నారు.

ముఖ్యమంత్రి చంద్రబాబు నాయుడు, మంత్రి నారా లోకేశ్‌ విదేశీ పర్యటనలకు సంబంధించిన కార్యక్రమాల సమన్వయంలో కూడా గురురాజా కీలక పాత్ర పోషించారు. అమెరికాతో పాటు ఇతర దేశాల్లో పార్టీ నేతల పర్యటనలు, ఎన్నారై సమావేశాల నిర్వహణలో ఆయన చురుగ్గా వ్యవహరించినట్లు పార్టీ వర్గాలు తెలిపాయి.

2024 అసెంబ్లీ ఎన్నికల సమయంలో కూడా గురురాజా కర్నూలు జిల్లాలో పర్యటించి కూటమి అభ్యర్థుల విజయానికి ప్రచార కార్యక్రమాల్లో పాల్గొన్నారు. ఎన్నారై విభాగాన్ని మరింత క్రియాశీలంగా మార్చి, విదేశాల్లో ఉన్న తెలుగు ప్రజలను పార్టీతో అనుసంధానం చేయడమే లక్ష్యంగా కొత్త కమిటీ పనిచేయనుంది.

కొత్త బాధ్యతలు స్వీకరించిన గురురాజాకు పార్టీ నాయకులు, ఎన్నారై కార్యకర్తలు అభినందనలు తెలిపారు. విదేశాల్లో ఉన్న తెలుగువారి సమస్యలను ప్రభుత్వం దృష్టికి తీసుకెళ్లడంతో పాటు, పార్టీ కార్యక్రమాలను విస్తృతంగా నిర్వహించేందుకు కృషి చేస్తానని గురురాజా పేర్కొన్నట్లు సమాచారం.