అమెరికాలో భారత సంతతి మహిళ హత్య.. గూగుల్‌ మాజీ ఉద్యోగి మృతి

గూగుల్‌ మాజీ ఎగ్జిక్యూటివ్‌, భారత సంతతికి చెందిన శీతల్‌ విజియెన్‌ హత్య ఘటన అమెరికాలో సంచలనం సృష్టించింది. జార్జియా రాష్ట్రంలోని కాబ్‌ కౌంటీలో ఉన్న లారెల్‌ క్రీక్‌ ట్రయల్‌ ప్రాంతంలో ఈ దారుణం చోటుచేసుకుంది. ఇంట్లోనే జరిగిన కాల్పుల్లో ఆమె ప్రాణాలు కోల్పోగా, కుటుంబ సభ్యుల్లో విషాదం నెలకొంది.

పోలీసుల వివరాల ప్రకారం.. ఘటన సమయంలో శీతల్‌ విజియెన్‌, ఆమె భర్త కిర్క్‌ బి విజియెన్‌, వారి కుమారుడు జేసన్‌ ఇంట్లో ఉన్నారు. ఒక్కసారిగా కాల్పుల శబ్దాలు వినిపించడంతో స్థానికులు పోలీసులకు సమాచారం అందించారు. ఘటనా స్థలానికి చేరుకున్న అధికారులు శీతల్‌ తీవ్ర గాయాలతో కనిపించగా, వెంటనే వైద్య సహాయం అందించే ప్రయత్నం చేసినప్పటికీ ఆమె మృతి చెందినట్లు తెలిపారు.

ఈ ఘటనలో వారి కుమారుడు జేసన్‌కు కూడా గాయాలైనట్లు పోలీసులు వెల్లడించారు. అతడికి వైద్య చికిత్స అందిస్తున్నట్లు తెలిపారు. కాల్పులకు దారితీసిన కారణాలపై దర్యాప్తు కొనసాగుతోందని అధికారులు పేర్కొన్నారు.

కాల్పులు జరిపినట్లు అనుమానిస్తున్న శీతల్‌ భర్త కిర్క్‌ బి విజియెన్‌ను పోలీసులు అదుపులోకి తీసుకున్నారు. అతడిపై తీవ్రమైన నేరారోపణలు నమోదు చేసి, వయోజనుల నిర్బంధ కేంద్రంలో ఉంచినట్లు తెలిపారు. కేసుకు సంబంధించిన పూర్తి వివరాలను సేకరించేందుకు దర్యాప్తు కొనసాగిస్తున్నారు.

శీతల్‌ విజియెన్‌ గతంలో గూగుల్‌లో ఎగ్జిక్యూటివ్‌ స్థాయి బాధ్యతలు నిర్వహించారు. సాంకేతిక రంగంలో అనుభవం కలిగిన ఆమె అమెరికాలో భారత సంతతి వృత్తిపరులలో గుర్తింపు పొందిన వ్యక్తిగా ఉన్నారు.

ఈ ఘటనపై స్థానిక భారతీయ సమాజం దిగ్భ్రాంతి వ్యక్తం చేసింది. కుటుంబానికి న్యాయం జరగాలని, ఘటన వెనుక ఉన్న పూర్తి కారణాలు వెలుగులోకి రావాలని వారు కోరుతున్నారు. పోలీసులు కుటుంబ నేపథ్యం, కాల్పులకు ముందు జరిగిన పరిణామాలు, ఇతర ఆధారాలను పరిశీలిస్తున్నారు.