బ్రహ్మపుత్రపై చైనా భారీ డ్యామ్‌.. భద్రతపై శాస్త్రవేత్తల సందేహాలు

బ్రహ్మపుత్ర నదిపై చైనా చేపడుతున్న భారీ జలవిద్యుత్‌ ప్రాజెక్టుపై భద్రతా ఆందోళనలు వ్యక్తమవుతున్నాయి. టిబెట్‌లోని హిమాలయ ప్రాంతంలో నిర్మిస్తున్న ఈ డ్యామ్‌ నిర్మాణ ప్రాంతంలోని భౌగోళిక పరిస్థితులు సవాల్‌గా మారవచ్చని చైనా భూగర్భ శాస్త్రవేత్తలు అభిప్రాయపడుతున్నట్లు సమాచారం.

హాంకాంగ్‌కు చెందిన సౌత్‌ చైనా మార్నింగ్‌ పోస్ట్‌ ప్రచురించిన కథనం ప్రకారం.. డ్యామ్‌ నిర్మిస్తున్న ప్రాంతంలోని భూపటలంలో ఉన్న సహజ పగుళ్లు, భౌగోళిక అస్థిరతలు భవిష్యత్తులో నిర్మాణ భద్రతపై ప్రభావం చూపే అవకాశం ఉందని శాస్త్రవేత్తలు హెచ్చరిస్తున్నారు. హిమాలయ ప్రాంతం భూకంపాలకు సున్నితమైన ప్రాంతం కావడంతో భారీ నిర్మాణాల విషయంలో మరింత జాగ్రత్త అవసరమని నిపుణులు సూచిస్తున్నారు.

చైనా చేపడుతున్న ఈ ప్రాజెక్టు ప్రపంచంలోనే అతిపెద్ద జలవిద్యుత్‌ ప్రాజెక్టుల్లో ఒకటిగా నిలవనుంది. బ్రహ్మపుత్ర నదిపై నిర్మిస్తున్న ఈ డ్యామ్‌ ద్వారా భారీ స్థాయిలో విద్యుత్‌ ఉత్పత్తి చేయాలని చైనా లక్ష్యంగా పెట్టుకుంది. ఏడాదికి దాదాపు 30 వేల కోట్ల కిలోవాట్ల విద్యుత్‌ ఉత్పత్తి చేయాలనే ప్రణాళికతో నిర్మాణ పనులు ప్రారంభించింది.

ఈ ప్రాజెక్టు భారత సరిహద్దుకు సమీపంలో ఉండటం వల్ల వ్యూహాత్మకంగానూ ప్రాధాన్యం సంతరించుకుంది. డ్యామ్‌ నిర్మాణం పూర్తయిన తర్వాత బ్రహ్మపుత్ర నది ప్రవాహంపై ప్రభావం పడే అవకాశం ఉందని భారత్‌ సహా దిగువ ప్రాంతాల్లోని దేశాలు గతంలో ఆందోళన వ్యక్తం చేశాయి.

బ్రహ్మపుత్ర నది టిబెట్‌ నుంచి ప్రవహిస్తూ అరుణాచల్‌ప్రదేశ్‌లోకి ప్రవేశించి, అనంతరం అసోం మీదుగా బంగ్లాదేశ్‌కు చేరుతుంది. నదీ ప్రవాహంలో మార్పులు, నీటి నిల్వలు, వరదల ప్రభావం వంటి అంశాలపై దిగువ ప్రాంత దేశాలు అప్రమత్తంగా ఉన్నాయి.

చైనా మాత్రం ఈ ప్రాజెక్టు పూర్తిగా విద్యుత్‌ ఉత్పత్తి, అభివృద్ధి అవసరాల కోసమే చేపడుతున్నామని చెబుతోంది. పర్యావరణ ప్రభావాలు, భద్రతా అంశాలను పరిగణనలోకి తీసుకుంటున్నట్లు పేర్కొంటోంది.

అయితే భారీ వ్యయం, క్లిష్టమైన హిమాలయ భౌగోళిక పరిస్థితులు, భూకంప ముప్పు నేపథ్యంలో ఈ ప్రాజెక్టుపై అంతర్జాతీయ స్థాయిలో చర్చ కొనసాగుతోంది. డ్యామ్‌ నిర్మాణ పురోగతి, భద్రతా చర్యలను పలు దేశాలు నిశితంగా పరిశీలిస్తున్నాయి.