లండన్‌లో చేనేత సందడి.. భారతీయ సంస్కృతిని చాటిన తెలుగు మహిళలు

భారత జాతీయ చేనేత దినోత్సవం సందర్భంగా యూకేలోని లండన్‌లో తెలుగు మహిళలు ప్రత్యేక వేడుకలు నిర్వహించారు. సంప్రదాయ చేనేత చీరలు ధరించి భారతీయ సంస్కృతి, సంప్రదాయాలు, చేనేత కళపై తమ అభిమానాన్ని చాటుకున్నారు.

‘తెలుగు లేడీస్‌ ఇన్‌ యూకే’ ఫేస్‌బుక్‌ గ్రూప్‌ అడ్మిన్‌ శ్రీదేవి మేనవల్లి ఈ కార్యక్రమాన్ని సమన్వయం చేశారు. యూకేలోని వివిధ ప్రాంతాల్లో నివసిస్తున్న తెలుగు మహిళలను ఒకే వేదికపైకి తీసుకురావడంలో ఆమె కీలక పాత్ర పోషించారు.

చేనేతను ప్రోత్సహించడంతో పాటు భారతీయ సంప్రదాయాలపై అవగాహన పెంచే ఉద్దేశంతో ఈ వేడుకను నిర్వహించారు. సెంట్రల్‌ లండన్‌, బర్మింగ్‌హామ్‌, మాంచెస్టర్‌, కోవెంట్రీ, రగ్బీ, మిల్టన్‌ కీన్స్‌, అమర్షమ్‌ తదితర ప్రాంతాల నుంచి తెలుగు మహిళలు ఉత్సాహంగా పాల్గొన్నారు.

ఈ సందర్భంగా మహిళలు ఉప్పాడ, పైఠాణీ, అజ్రఖ్‌, మంగళగిరి, కాంచీపురం, కోటా కాటన్‌ తదితర ప్రాంతాలకు చెందిన విభిన్న రకాల చేనేత చీరలను ధరించారు. వీటి ద్వారా భారతదేశంలోని వివిధ ప్రాంతాల ప్రత్యేక చేనేత కళను విదేశీ గడ్డపై ప్రదర్శించారు.

చేనేత చీర కేవలం అందం, అలంకరణకు మాత్రమే పరిమితం కాదని మహిళలు పేర్కొన్నారు. ప్రతి చేనేత వస్త్రం వెనుక నేత కార్మికుడి శ్రమ, నైపుణ్యం, సృజనాత్మకత దాగి ఉంటాయని తెలిపారు. చేనేత వస్త్రాలను ఆదరించడం ద్వారా సంప్రదాయ వృత్తులకు, నేత కార్మికుల కుటుంబాలకు అండగా నిలవాల్సిన అవసరం ఉందని చెప్పారు.

స్థానికంగా తయారయ్యే చేనేత ఉత్పత్తులకు ప్రాధాన్యం ఇవ్వడం ద్వారా నేత కార్మికులకు మరింత ప్రోత్సాహం లభిస్తుందని పేర్కొన్నారు. విదేశాల్లో నివసిస్తున్నప్పటికీ భారతీయ సంస్కృతి, సంప్రదాయాలపై తమ అనుబంధాన్ని కొనసాగించేందుకు ఇలాంటి కార్యక్రమాలు దోహదపడతాయని అన్నారు.

యూకే నలుమూలల నుంచి తెలుగు మహిళలు ఒకే వేదికపైకి వచ్చి చేనేత చీరలతో సందడి చేయడం ప్రత్యేక ఆకర్షణగా నిలిచింది. భారతీయ సంస్కృతిని, చేనేత వైభవాన్ని విదేశీ గడ్డపై సజీవంగా ఉంచడంలో ఈ వేడుక మరోసారి తమ ఐక్యతను చాటిందని నిర్వాహకులు పేర్కొన్నారు.