ఆర్‌ఆర్‌ఆర్‌ ఉత్తరభాగంపై మళ్లీ నాన్చివేత

ప్రాంతీయ వలయ రహదారి(ఆర్‌ఆర్‌ఆర్‌) ఉత్తరభాగం పనుల విషయంలో జాప్యం కొనసాగుతోంది. ఇప్పటికే పలుమార్లు టెండర్ల గడువును పొడిగించిన జాతీయ రహదారుల ప్రాధికార సంస్థ(ఎన్‌హెచ్‌ఏఐ).. తాజాగా మరోసారి బిడ్ల దాఖలు గడువును పెంచింది. వాస్తవానికి ఈ నెల 21న బిడ్లను తెరవాల్సి ఉండగా.. తాజాగా సెప్టెంబరు 23 వరకు గడువు పొడిగించింది. దీంతో కీలకమైన ఈ ప్రాజెక్టు పనులు ఎప్పుడు పట్టాలెక్కుతాయన్న దానిపై సందేహాలు వ్యక్తమవుతున్నాయి.

సంగారెడ్డి జిల్లాలోని గిర్మాపూర్‌ నుంచి యాదాద్రి భువనగిరి జిల్లాలోని తంగడ్‌పల్లి వరకు 161.518 కిలోమీటర్ల మేర ఆరు వరసల గ్రీన్‌ఫీల్డ్‌ రీజినల్‌ ఎక్స్‌ప్రెస్‌వేను నిర్మించేందుకు ప్రణాళిక రూపొందించారు. తొలుత పనులను ఐదు ప్యాకేజీలుగా చేపట్టాలని భావించినా.. అనంతరం వాటిని రెండు ప్యాకేజీలుగా కుదించారు. ఈ రెండు ప్యాకేజీలకు ఎన్‌హెచ్‌ఏఐ ఈ ఏడాది మే 20న టెండర్లు ఆహ్వానించింది.

తొలుత బిడ్లు సమర్పించేందుకు జూలై 6 వరకు అవకాశం ఇచ్చారు. అనంతరం గడువును ఆగస్టు 6 వరకు పొడిగించారు. ఆ తర్వాత ఈ నెల 20 వరకు మరోసారి గడువు పెంచారు. తాజాగా సెప్టెంబరు 23 వరకు అవకాశం కల్పిస్తూ ఎన్‌హెచ్‌ఏఐ నిర్ణయం తీసుకుంది. వరుసగా గడువులు పొడిగిస్తుండటంతో టెండర్ల ప్రక్రియపై ఆసక్తి నెలకొంది.

ఆర్‌ఆర్‌ఆర్‌ ఉత్తరభాగానికి కేంద్ర ఆర్థిక వ్యవహారాల క్యాబినెట్‌ కమిటీ(సీసీఈఏ) అనుమతి మినహా దాదాపు అన్ని కీలక అనుమతులు ఇప్పటికే లభించాయి. ఈ రహదారికి ‘ఎన్‌హెచ్‌-161ఏఏ’ నంబరును కూడా కేటాయించారు. ప్రాజెక్టు కోసం కేంద్ర ప్రభుత్వం ఎన్‌హెచ్‌ఏఐకు రూ.23,935 కోట్లను కేటాయించింది.

ఇందులో రూ.9,362 కోట్లతో సివిల్‌ పనులను హైబ్రిడ్‌ యాన్యుటీ మోడల్‌(హ్యామ్‌) పద్ధతిలో చేపట్టనున్నారు. ఇంతటి భారీ ప్రాజెక్టుకు అవసరమైన ప్రక్రియలు ముందుకు సాగుతున్నప్పటికీ.. టెండర్ల ఖరారులో మాత్రం జాప్యం జరుగుతుండటం చర్చనీయాంశంగా మారింది.

సాధారణంగా ఎన్‌హెచ్‌ఏఐ పరిధిలోని ప్రాజెక్టులకు టెండర్లు ఖరారైన అనంతరం సీసీఈఏ అనుమతులు వచ్చే సందర్భాలు ఉంటాయని రాష్ట్ర అధికారులు చెబుతున్నారు. అయితే ఆర్‌ఆర్‌ఆర్‌ ఉత్తరభాగం విషయంలో టెండర్ల ప్రక్రియను పదేపదే పొడిగించడానికి కారణమేంటన్నది స్పష్టంగా తెలియడం లేదని వారు పేర్కొంటున్నారు.

ఉత్తర తెలంగాణ, హైదరాబాద్‌ పరిసర ప్రాంతాల రవాణా వ్యవస్థలో ఆర్‌ఆర్‌ఆర్‌ కీలకంగా మారనుంది. పరిశ్రమలు, వ్యవసాయ మార్కెట్లు, పట్టణ ప్రాంతాలను అనుసంధానించే ఈ రహదారి పూర్తయితే ప్రాంతీయ రవాణా సౌకర్యాలు మెరుగుపడటంతో పాటు నగరంపై పెరుగుతున్న ట్రాఫిక్‌ ఒత్తిడి తగ్గే అవకాశం ఉంది.

అయితే టెండర్ల ప్రక్రియలోనే వరుసగా జాప్యం జరుగుతుండటంతో ప్రాజెక్టు నిర్మాణ పనులు ఎప్పుడు ప్రారంభమవుతాయన్నది ప్రశ్నార్థకంగా మారింది. సెప్టెంబరు 23నైనా బిడ్ల ప్రక్రియ పూర్తవుతుందా? అనంతరం టెండర్లను ఎప్పుడు ఖరారు చేస్తారు? పనులు ఎప్పుడు ప్రారంభిస్తారన్నదే ఇప్పుడు ఆసక్తికరంగా మారింది.