రెండేళ్లు ఓడిపోలేదు.. అయినా కెప్టెన్సీ మారింది: సూర్యకుమార్ ఆవేదన

టీమ్‌ఇండియా మాజీ టీ20 కెప్టెన్ సూర్యకుమార్ యాదవ్ నాయకత్వ మార్పుపై తొలిసారి స్పందించాడు. కెప్టెన్సీ నుంచి తనను తప్పించి శ్రేయస్ అయ్యర్‌కు బాధ్యతలు అప్పగించిన విషయంపై తన అనుభవాలను పంచుకున్నాడు.

తన పేరు కెప్టెన్‌గా లేదని తెలిసిన సమయంలో తాను నవ్వానని సూర్య తెలిపాడు. ఒత్తిడిని ఎదుర్కొనే సమయంలో ఎప్పుడూ ప్రశాంతంగా ఉండటం తన స్వభావమని చెప్పాడు. అయితే ఈ నిర్ణయం మాత్రం తాను ఊహించలేదని వెల్లడించాడు.

టీ20 ప్రపంచకప్ గెలిచిన తర్వాత మరో రెండేళ్లు జట్టును నడిపిస్తానని భావించానని, రాబోయే ఒలింపిక్స్‌లోనూ నాయకత్వం వహిస్తానని అనుకున్నట్లు తెలిపాడు. కానీ సెలక్టర్ల ఆలోచనలు భిన్నంగా ఉన్నాయని, వారి నిర్ణయాలను గౌరవించాలని పేర్కొన్నాడు.

‘‘రెండేళ్లలో ఒక్క సిరీస్ కూడా కోల్పోలేదు. ప్రపంచకప్, ఆసియా కప్‌లను గెలిచాం. అంతా సవ్యంగా సాగుతున్న సమయంలో మార్పు ఎందుకు జరిగిందనే ఆలోచన మాత్రం నాలో వచ్చింది’’ అని సూర్య చెప్పాడు.

కెప్టెన్సీ నుంచి తప్పించిన విషయం తెలిసిన తర్వాత దాదాపు నెలన్నర పాటు ఇంట్లోనే ఉన్నానని తెలిపాడు. స్నేహితులు వచ్చి ఇది జీవితంలో ఒక భాగమని చెప్పినా, వారు వెళ్లిన తర్వాత ఒంటరిగా ఆలోచించేవాడినని వెల్లడించాడు.

అయితే జట్టు ఎప్పుడైనా తన అవసరం ఉంటే అందుబాటులో ఉంటానని సూర్య స్పష్టం చేశాడు. శ్రేయస్ అయ్యర్ మంచి ఆటగాడితో పాటు మంచి కెప్టెన్ అని ప్రశంసించాడు. జట్టు విజయమే తనకు ముఖ్యమని పేర్కొన్నాడు.