ఏఎన్‌ఎం పోస్టుల తొలి ప్రొవిజనల్‌ మెరిట్‌ జాబితా విడుదల

ఏఎన్‌ఎం (ఆక్సిలరీ నర్స్‌ మిడ్‌వైఫ్‌) పోస్టుల భర్తీ ప్రక్రియలో భాగంగా మెడికల్‌ అండ్‌ హెల్త్‌ సర్వీసెస్‌ రిక్రూట్‌మెంట్‌ బోర్డు (ఎంహెచ్‌ఎస్‌ఆర్‌బీ) కీలక అప్‌డేట్‌ విడుదల చేసింది. మొత్తం 1,931 ఎంపీహెచ్‌ఏ-ఫిమేల్‌ పోస్టుల భర్తీకి సంబంధించి తొలి ప్రొవిజనల్‌ మెరిట్‌ జాబితాను శుక్రవారం విడుదల చేసింది.

ఈ నియామక ప్రక్రియలో భాగంగా గతంలో అభ్యర్థులు సాధించిన పరీక్ష మార్కులు, కాంట్రాక్టు లేదా అవుట్‌సోర్సింగ్‌ సేవలకు సంబంధించిన వెయిటేజీ మార్కులను పరిగణనలోకి తీసుకుని ప్రొవిజనల్‌ జాబితాను రూపొందించారు. మే 14న మొదటి జాబితాను విడుదల చేసి, అభ్యర్థుల నుంచి అభ్యంతరాలను స్వీకరించారు.

అభ్యర్థుల నుంచి వచ్చిన అభ్యంతరాలను పరిశీలించిన తర్వాత, అవసరమైన మార్పులు చేసి సవరించిన తొలి ప్రొవిజనల్‌ మెరిట్‌ జాబితాను ఎంహెచ్‌ఎస్‌ఆర్‌బీ తాజాగా అందుబాటులోకి తీసుకొచ్చింది. అభ్యర్థులు తమ వివరాలను అధికారిక వెబ్‌సైట్‌లో పరిశీలించుకోవచ్చని బోర్డు సూచించింది.

తాజా మెరిట్‌ జాబితాపై అభ్యంతరాలు లేదా అభిప్రాయాలు ఉంటే అభ్యర్థులు ఈ నెల 13వ తేదీ నుంచి 15వ తేదీ సాయంత్రం 5 గంటల వరకు ఎంహెచ్‌ఎస్‌ఆర్‌బీ వెబ్‌సైట్‌ ద్వారా నమోదు చేసుకోవచ్చని అధికారులు తెలిపారు. గడువు ముగిసిన తర్వాత వచ్చిన అభ్యంతరాలను పరిగణనలోకి తీసుకోబోమని స్పష్టం చేశారు.

అభ్యర్థులు అభ్యంతరాలు సమర్పించే సమయంలో తమ వాదనకు సంబంధించిన ఆధారాలను జత చేయాలని బోర్డు సూచించింది. అందిన అభ్యంతరాలను పరిశీలించిన అనంతరం తుది ఎంపిక జాబితాను విడుదల చేసే అవకాశం ఉంది.

ఈ నియామకాల ద్వారా రాష్ట్రంలోని ప్రభుత్వ ఆరోగ్య వ్యవస్థలో ఏఎన్‌ఎం సేవలను మరింత బలోపేతం చేయాలని ప్రభుత్వం లక్ష్యంగా పెట్టుకుంది. గ్రామీణ ప్రాంతాల్లో ప్రాథమిక ఆరోగ్య సేవల అందుబాటులో ఏఎన్‌ఎంల పాత్ర కీలకంగా ఉండటంతో ఈ పోస్టుల భర్తీపై అభ్యర్థుల్లో ఆసక్తి నెలకొంది.