ప్రేమ కోసం సైకిల్‌పై ఖండాంతర ప్రయాణం.. పీకే మహానందియా కథగా ‘ది సైకిల్‌ ఆఫ్‌ లవ్‌’

ప్రేమకు హద్దులు లేవని నిరూపించిన ఓ అసాధారణ ప్రయాణం ఇప్పుడు వెండితెరపైకి రాబోతోంది. భారతీయ కళాకారుడు పీకే మహానందియా జీవితంలోని అద్భుతమైన ప్రేమకథను డాక్యుమెంటరీ రూపంలో ప్రేక్షకుల ముందుకు తీసుకురానున్నారు. ‘ది సైకిల్‌ ఆఫ్‌ లవ్‌’ పేరుతో రూపొందుతున్న ఈ చిత్రానికి నటి Priyanka Chopra Jonas ఎగ్జిక్యూటివ్‌ నిర్మాతగా వ్యవహరిస్తున్నారు.

దిల్లీలో వీధి చిత్రకారుడిగా జీవనం సాగించిన పీకే మహానందియాకు స్వీడన్‌కు చెందిన పర్యాటకురాలు షార్లెట్‌ వాన్‌ షెడ్విన్‌తో పరిచయం ఏర్పడింది. ఆ పరిచయం క్రమంగా ప్రేమగా మారి ఇద్దరూ వివాహం చేసుకున్నారు. కొంతకాలం తర్వాత షార్లెట్‌ తన స్వదేశానికి తిరిగి వెళ్లాల్సి వచ్చింది. త్వరలోనే తిరిగి వస్తానని చెప్పినా.. ఆమె రాక ఆలస్యం కావడంతో పీకే తన భార్యను కలవాలని నిర్ణయించుకున్నాడు.

విమాన ప్రయాణానికి సరిపడా డబ్బు లేకపోయినా ప్రేమపై నమ్మకంతో సైకిల్‌నే తన ప్రయాణ సాధనంగా ఎంచుకున్నాడు. దిల్లీ నుంచి వేల కిలోమీటర్ల దూరంలో ఉన్న స్వీడన్‌ వరకు సైకిల్‌పై ప్రయాణం ప్రారంభించాడు. ఎన్నో కష్టాలు, సవాళ్లు ఎదురైనా తన లక్ష్యాన్ని వదలకుండా ముందుకు సాగి చివరకు తన సతీమణిని చేరుకున్నాడు.

ఈ అపూర్వ ప్రేమయాత్రను ప్రపంచ ప్రేక్షకులకు పరిచయం చేయడానికి రూపొందుతున్న ‘ది సైకిల్‌ ఆఫ్‌ లవ్‌’కు ఆస్కార్‌ అవార్డు విజేత Orlando von Einsiedel దర్శకత్వం వహిస్తున్నారు. ఇటీవల విడుదలైన ట్రైలర్‌కు మంచి స్పందన లభిస్తోంది.

ట్రైలర్‌ను పంచుకున్న ప్రియాంక చోప్రా.. పీకే మహానందియా ప్రయాణం తనను ఎంతో ఆశ్చర్యపరిచిందని పేర్కొంది. ప్రేమ కోసం ఖండాలను దాటిన ఈ కథ కేవలం సాహసయాత్ర మాత్రమే కాదని, మానవ భావోద్వేగాలను ప్రతిబింబించే గొప్ప కథ అని ఆమె అభివర్ణించింది.

భారత్‌, స్వీడన్‌ల మధ్య సాగిన ఈ నిజ జీవిత ప్రేమకథను ప్రపంచవ్యాప్తంగా ప్రేక్షకులకు అందించేందుకు చిత్రబృందం సిద్ధమవుతోంది. ఈ డాక్యుమెంటరీ అమెరికాలో ఆగస్టు 28న, యూకేలో సెప్టెంబరు 18న థియేటర్లలో విడుదల కానుంది.