డీకే ప్రభుత్వంలో తొలి సంక్షోభం.. కొత్త మంత్రి రాజీనామాతో కలకలం

కర్ణాటక ముఖ్యమంత్రిగా డీకే శివకుమార్ బాధ్యతలు చేపట్టిన కొద్ది రోజులకే ఆయన ప్రభుత్వానికి తొలి రాజకీయ కుదుపు ఎదురైంది. కొత్త మంత్రివర్గంలో చోటు దక్కిన సీనియర్ నేత రామలింగారెడ్డి, తనకు కేటాయించిన శాఖపై అసంతృప్తి వ్యక్తం చేస్తూ మంత్రి పదవికి రాజీనామా చేశారు.

జూన్ 3న డీకే శివకుమార్ ముఖ్యమంత్రిగా ప్రమాణ స్వీకారం చేయగా, 13 మంది మంత్రులతో కొత్త కేబినెట్ ఏర్పాటు చేశారు. అయితే నగరాభివృద్ధి శాఖ ఇస్తానని హామీ ఇచ్చినప్పటికీ, చివరికి నీటిపారుదల శాఖ కేటాయించడంతో తాను తీవ్ర నిరాశకు గురయ్యానని రామలింగారెడ్డి వెల్లడించారు.

తనకు అవగాహన లేని శాఖను అప్పగించడం సరైన నిర్ణయం కాదని పేర్కొంటూ మీడియా సమక్షంలోనే రాజీనామా లేఖపై సంతకం చేశారు. ఇకపై ఏ మంత్రిత్వ శాఖను ఆఫర్ చేసినా స్వీకరించబోనని, అయితే కాంగ్రెస్ పార్టీలోనే కొనసాగుతూ ఎమ్మెల్యేగా సేవలందిస్తానని స్పష్టం చేశారు.

ఈ పరిణామంపై భాజపా తీవ్ర విమర్శలు గుప్పించింది. కాంగ్రెస్‌లో అంతర్గత విభేదాలు మరింత పెరుగుతాయని, నాయకత్వ మార్పు పార్టీకి ప్రయోజనం చేకూర్చదని కేంద్ర మంత్రి ప్రహ్లాద్ జోషి వ్యాఖ్యానించారు.

మరోవైపు కాంగ్రెస్ నాయకత్వం మాత్రం పరిస్థితిని తేలికగా తీసుకుంటోంది. రామలింగారెడ్డి పార్టీకి ముఖ్యమైన నాయకుడని, సమస్యను చర్చల ద్వారా పరిష్కరిస్తామని పేర్కొంది.

రాజీనామా అంశంపై స్పందించిన ముఖ్యమంత్రి డీకే శివకుమార్, రామలింగారెడ్డి సీనియర్ నాయకుడని, ఆయన ఆందోళనలను గౌరవిస్తున్నామని తెలిపారు. త్వరలోనే మాట్లాడుకుని సమస్యను పరిష్కరించుకుంటామని వెల్లడించారు.ఈ ఘటనతో కొత్తగా ఏర్పడిన డీకే ప్రభుత్వానికి తొలి రాజకీయ సవాల్ ఎదురైనట్లు రాజకీయ విశ్లేషకులు అభిప్రాయపడుతున్నారు.