గల్ఫ్ దేశాల్లో అమెరికా స్థావరాలపై ఇరాన్ భారీ దాడులు

పశ్చిమాసియాలో యుద్ధ పరిస్థితులు రోజురోజుకు మరింత తీవ్రమవుతున్నాయి. ఇరాన్ ప్రతీకార దాడులు కొనసాగిస్తూ గల్ఫ్ దేశాల్లోని అమెరికా స్థావరాలపై క్షిపణులతో దాడులు చేసింది. ముఖ్యంగా సౌదీ అరేబియాలోని ప్రిన్స్ సుల్తాన్ ఎయిర్‌బేస్‌పై జరిగిన దాడిలో పలువురు అమెరికా సైనికులు గాయపడగా, యుద్ధ విమానాలు కూడా దెబ్బతిన్నట్లు సమాచారం.

బహ్రెయిన్‌లోని అమెరికా స్థావరాలపై కూడా దాడులు జరిగాయి. మరోవైపు సౌదీ రాజధాని రియాద్‌పై దూసుకొచ్చిన ఇరాన్ క్షిపణులు, డ్రోన్లను రక్షణ వ్యవస్థలు కూల్చివేశాయి. కువైట్‌లో కొన్ని వాణిజ్య భవనాలు కూడా దెబ్బతిన్నట్లు తెలుస్తోంది. ఇజ్రాయెల్‌లో శనివారం తెల్లవారుజామున పలు ప్రాంతాల్లో భారీ పేలుళ్లు చోటుచేసుకోవడంతో ఉద్రిక్తత మరింత పెరిగింది. ఇదే సమయంలో హర్మూజ్ జలసంధి గుండా మానవతా సహాయం, వ్యవసాయ సరుకుల రవాణాకు ఇరాన్ అనుమతి ఇవ్వడం కొంత ఉపశమనం కలిగించే అంశంగా భావిస్తున్నారు.

ఇక ఇజ్రాయెల్ దాడులు కూడా కొనసాగుతున్నాయి. ఇరాన్‌లోని క్షిపణి తయారీ కేంద్రాలు, అణు సంబంధిత సదుపాయాలపై లక్ష్యంగా దాడులు జరిపినట్లు ఇజ్రాయెల్ ప్రకటించింది. ఈ దాడుల్లో అణు కార్యక్రమానికి చెందిన కీలక మౌలిక సదుపాయాలు దెబ్బతిన్నాయని తెలిపింది.లెబనాన్‌లో హెజ్‌బొల్లా స్థావరాలపై ఇజ్రాయెల్ దాడులు జరపగా, అక్కడ కూడా ప్రాణనష్టం సంభవించింది. ఈ యుద్ధం ఇలాగే కొనసాగితే పెద్ద స్థాయిలో మానవతా సంక్షోభం ఏర్పడే ప్రమాదం ఉందని ఐక్యరాజ్యసమితి హెచ్చరించింది. మొత్తం మీద పశ్చిమాసియా పరిస్థితులు మరింత ఆందోళనకరంగా మారుతున్నాయి.