డిజిటల్ తెరల వెనుక దాగి ఉన్న ప్రమాదం: పిల్లల జీవక్రియపై టెక్నాలజీ పంజా!

చిన్న పిల్లలందరికీ డిజిటల్‌ తెరల వాడకం జాగ్రత్త! ఫోన్, ట్యాబ్లెట్, టీవీ గంటలపాటు ఎక్కువగా వాడుతున్న పిల్లల్లో నిద్ర తగినంత పొందకపోవడం, గుండె, జీవక్రియల ఆరోగ్యంపై ప్రతికూల ప్రభావాలను చూపుతున్నట్టు కొత్త అధ్యయనాలు సూచిస్తున్నాయి. అమెరికన్‌ హార్ట్‌ అసోసియేషన్‌లో ప్రచురితమైన తాజా పరిశోధన ప్రకారం, దీర్ఘకాలం డిజిటల్ పరికరాలను ఎక్కువ వాడడం అధిక రక్తపోటు, అధిక కొలెస్ట్రాల్, ఇన్సులిన్ నిరోధకత (insulin resistance) వంటి సమస్యలకు దారి తీస్తుంది. రాత్రిపూట తక్కువ నిద్రపోతే ఈ ముప్పు ఇంకా పెరుగుతుంది.

అధ్యయనంలో 10–18 ఏళ్ల వయసులోని పిల్లలను రెండు బృందాలుగా విభజించి, టెక్నాలజీ వాడకం, నిద్ర, శారీరక ఆరోగ్యం సంబంధిత వివరాలు విశ్లేషించారు. నడుం చుట్టుకొలత, సిస్టాలిక్ రక్తపోటు, మంచి కొలెస్ట్రాల్, ట్రైగ్లిజరైడ్లు, గ్లూకోజ్ మోతాదులను ఆధారంగా గుండె జీవక్రియ ముప్పు స్కోర్‌ను అంచనా వేశారు.

ఫోన్, ట్యాబ్లెట్, టీవీ వాడకానికి అదనంగా ఉన్న ప్రతి గంటకి ఈ గుండె ముప్పు గణనీయంగా పెరుగుతున్నట్టు తేలింది. కొన్ని పిల్లలు రోజుకు 3–6 గంటలపాటు తెరలపై ఎక్కువ సమయం గడుపుతున్నారని పరిశోధకులు హెచ్చరిస్తున్నారు.

పరిశోధకుల సిఫార్సు ప్రకారం, పిల్లల్లో డిజిటల్ తెరల వాడకాన్ని పరిమితం చేయడం, సమయానికి నిద్ర, సమతుల్య ఆహారం, వ్యాయామం వంటి మార్గాలను పాటించడం ద్వారా దీర్ఘకాలంలో గుండె ఆరోగ్యం, జీవక్రియల స్థితి మెరుగుపడుతుంది.