తమిళనాడు ఆస్పత్రుల్లో ఇక వాట్సప్‌తో ఓపీ టోకెన్లు.. ‘నలం ఏఐ’ సేవలు ప్రారంభం

తమిళనాడు ప్రభుత్వ ఆస్పత్రుల్లో రోగులకు వైద్య సేవలు మరింత సులభంగా అందించేందుకు ఆరోగ్యశాఖ కొత్త డిజిటల్‌ సేవలను ప్రారంభించింది. ఔట్‌ పేషెంట్‌ (ఓపీ) టోకెన్లు తీసుకునే సమయంలో ఆస్పత్రుల వద్ద ఏర్పడే రద్దీని తగ్గించడంతో పాటు, రోగులు ఎక్కువసేపు క్యూలలో వేచి ఉండాల్సిన పరిస్థితిని నివారించేందుకు ‘నలం ఏఐ’ పేరుతో వాట్సప్‌ చాట్‌బాట్‌ సేవలను అందుబాటులోకి తీసుకొచ్చింది.

ఈ సేవ ద్వారా ఇంటి నుంచే ఓపీ టోకెన్‌ పొందడం, ఆస్పత్రి రిజిస్ట్రేషన్‌ ప్రక్రియ పూర్తి చేయడం వంటి సదుపాయాలు అందుబాటులో ఉంటాయి. రోగులు 96192 22999 వాట్సప్‌ నంబరుకు ఆంగ్లంలో ‘Hi’ అని మెసేజ్‌ పంపితే చాట్‌బాట్‌ సేవలు ప్రారంభమవుతాయి. అనంతరం మొబైల్‌ నంబర్‌ను నమోదు చేసి, ఓటీపీ ద్వారా లాగిన్‌ అయిన తర్వాత అవసరమైన వైద్య సేవలను ఎంచుకోవచ్చు.

చాట్‌బాట్‌లో రోగుల రిజిస్ట్రేషన్‌, డాక్టర్‌ ప్రిస్క్రిప్షన్‌ వివరాలు, ల్యాబ్‌ రిపోర్టులు, ఆరోగ్య గుర్తింపు కార్డు, ఆస్పత్రి అపాయింట్‌మెంట్‌ బుకింగ్‌, సమీపంలోని ప్రభుత్వ ఆస్పత్రుల సమాచారం వంటి పలు సేవలు అందుబాటులో ఉన్నాయి.

ప్రస్తుతం అపాయింట్‌మెంట్‌ బుకింగ్‌ సదుపాయం చెన్నైలోని రాజీవ్‌గాంధీ ప్రభుత్వ జనరల్‌ ఆస్పత్రిలో మాత్రమే అందుబాటులో ఉంది. త్వరలో రాష్ట్రంలోని ఇతర ప్రభుత్వ ఆస్పత్రుల్లోనూ ఈ సేవలను విస్తరించనున్నారు.

తొలి దశలో చెన్నైతో పాటు తమిళనాడులోని 22 జిల్లాల్లో వాట్సప్‌ చాట్‌బాట్‌ సేవలను ప్రారంభించారు. భవిష్యత్తులో రాష్ట్రంలోని అన్ని జిల్లాలకు ఈ సదుపాయాన్ని విస్తరించాలని ఆరోగ్యశాఖ ప్రణాళికలు రూపొందిస్తోంది.

డిజిటల్‌ సాంకేతికతను ఉపయోగించడం ద్వారా రోగులకు వేగవంతమైన సేవలు అందించడంతో పాటు, ఆస్పత్రులలో పరిపాలనా భారం తగ్గుతుందని అధికారులు భావిస్తున్నారు. ముఖ్యంగా వృద్ధులు, దూర ప్రాంతాల నుంచి వచ్చే రోగులకు ఈ సేవలు మరింత ఉపయోగకరంగా ఉండనున్నాయి.