భారతీయ మూలాలపై విమర్శలు.. ఉషా వాన్స్‌ ఘాటు కౌంటర్‌

అమెరికా ఉపాధ్యక్షుడు జేడీ వాన్స్‌ సతీమణి ఉషా వాన్స్‌ భారతీయ మూలాలను ప్రస్తావిస్తూ చేసిన వ్యాఖ్యలు వివాదానికి దారితీశాయి. మిషిగన్‌ సెనెట్‌ అభ్యర్థి, డెమోక్రటిక్‌ నేత అబ్దుల్‌ ఎల్‌ సయేద్‌ చేసిన వ్యాఖ్యలపై ఉషా వాన్స్‌ తాజాగా స్పందించారు. అయితే ఆ విమర్శలకు ఆమె ఆగ్రహంతో కాకుండా హుందాగా సమాధానం ఇవ్వడం చర్చనీయాంశమైంది.

ఇటీవల ఓ ప్రచార కార్యక్రమంలో జేడీ వాన్స్‌ మాట్లాడుతూ అబ్దుల్‌ సయేద్‌పై విమర్శలు చేశారు. షరియా చట్టంపై వస్తున్న విమర్శలను శ్వేతజాతీయ ఆధిపత్య భావజాలంతో ముడిపెట్టి సయేద్‌ వ్యాఖ్యానిస్తున్నారని వాన్స్‌ పేర్కొన్నారు. ఈ తరహా అభిప్రాయాలు డెమోక్రటిక్‌ నేత నుంచి రావడం ఆశ్చర్యంగా ఉందన్నారు. ఇది తన తాత నమ్మిన డెమోక్రటిక్‌ పార్టీ కాదని వ్యాఖ్యానించారు.

ఈ వ్యాఖ్యలకు సోషల్‌ మీడియా వేదికగా అబ్దుల్‌ సయేద్‌ స్పందించారు. ‘‘కాలంలో వెనక్కి వెళ్లే అవకాశం వస్తే.. వాన్స్‌ తన తాతకు ఉషను పరిచయం చేస్తారా?’’ అంటూ వ్యాఖ్యానించారు. ఉషా వాన్స్‌ భారతీయ మూలాలను పరోక్షంగా ప్రస్తావిస్తూ చేసిన ఈ వ్యాఖ్యలు నెట్టింట తీవ్ర చర్చకు దారితీశాయి.

ఈ వివాదంపై ఓ మీడియా ఇంటర్వ్యూలో ఉషా వాన్స్‌ను ప్రశ్నించగా.. ఆమె ఆసక్తికరంగా స్పందించారు. జేడీ వాన్స్‌ బామ్మాతాతలను తాను ఎప్పుడూ కలవలేదని, అయితే వారు పెంచిన పిల్లలు అంటే వాన్స్‌ తల్లిదండ్రులు తనకు తెలుసని చెప్పారు. వారిని తాను ఎంతో ఇష్టపడతానని తెలిపారు.

తన అత్తింటి కుటుంబ సభ్యులు తనపై ఎంతో ప్రేమ చూపిస్తారని ఉషా వాన్స్‌ పేర్కొన్నారు. వాన్స్‌ ఆంటీ తనకు తల్లితో సమానమని చెప్పారు. కుటుంబ సభ్యులంతా తనను ఇంత ఆప్యాయంగా చూసుకుంటున్నారంటే.. వారిని పెంచిన బామ్మాతాతలు కూడా ఎంతో ప్రేమను పంచి ఉంటారని భావిస్తున్నట్లు తెలిపారు.

‘‘ఇప్పుడు వారంతా నా కుటుంబం’’ అని ఉషా వాన్స్‌ పేర్కొన్నారు. జాతి, మూలాలను ప్రస్తావిస్తూ వచ్చిన విమర్శలకు కుటుంబ అనుబంధాన్ని గుర్తుచేస్తూ ఆమె ఇచ్చిన సమాధానం సోషల్‌ మీడియాలో చర్చకు కారణమవుతోంది.