‘నేను గెలిపిస్తా’ అంటూ కోచ్‌కు ధైర్యం చెప్పిన వైభవ్

హ్యాట్రిక్ ఓటములతో ప్లేఆఫ్స్ అవకాశాలను సంక్లిష్టం చేసుకున్న రాజస్థాన్ రాయల్స్, ఎట్టకేలకు లఖ్‌నవూపై అద్భుత విజయంతో తిరిగి రేసులోకి వచ్చింది. ఈ విజయానికి ప్రధాన కారణంగా యువ ఆటగాడు వైభవ్ సూర్యవంశీ నిలిచాడు. అతడి మెరుపు బ్యాటింగ్ జట్టుకు కొత్త ఊపునిచ్చింది.

మ్యాచ్‌కు ముందు జరిగిన ఆసక్తికర ఘటనను వైభవ్ స్వయంగా ఓ ఇంటర్వ్యూలో వెల్లడించాడు. ఆర్‌ఆర్ ప్రధాన కోచ్ కుమార సంగక్కర చాలా ఒత్తిడిలో ఉన్నారని గమనించినట్లు చెప్పాడు. ఆ సమయంలో తాను మాత్రం పూర్తి ఆత్మవిశ్వాసంతో ఉన్నానని, జట్టును గెలిపిస్తానని కోచ్‌కు భరోసా ఇచ్చానని వివరించాడు. ఈ వ్యాఖ్యలు ప్రస్తుతం క్రికెట్ వర్గాల్లో చర్చనీయాంశంగా మారాయి.

గత మూడు మ్యాచ్‌లలో జట్టుకు అనుకూల ఫలితాలు రాకపోయినా, లఖ్‌నవూ మ్యాచ్‌లో భారీ లక్ష్యాన్ని సైతం ఆర్‌ఆర్ ఛేదించింది. వైభవ్ 38 బంతుల్లో 93 పరుగులతో విధ్వంసకర ఇన్నింగ్స్ ఆడాడు. ఇందులో 7 ఫోర్లు, 10 సిక్స్‌లు ఉండటం విశేషం. అతడి దూకుడుతో రాజస్థాన్ రాయల్స్ 7 వికెట్ల తేడాతో సునాయాస విజయం సాధించింది.

ప్రస్తుతం వైభవ్ సూర్యవంశీ 579 పరుగులతో ఆరెంజ్ క్యాప్ రేసులో మూడో స్థానంలో కొనసాగుతున్నాడు. ముంబయితో జరగనున్న చివరి లీగ్ మ్యాచ్ ఆర్‌ఆర్‌కు కీలకంగా మారనుంది. ఆ మ్యాచ్‌లో గెలిస్తే జట్టు నాకౌట్ దశకు చేరుకునే అవకాశం ఉంది.

వైభవ్ ప్రదర్శనపై మాజీ క్రికెటర్ కిరణ్ మోరె కూడా ప్రశంసలు కురిపించారు. సచిన్ తెందూల్కర్ ప్రారంభ దశను గుర్తు చేస్తూ, వైభవ్ కూడా అదే స్థాయిలో ప్రత్యేకమైన ఆటగాడిగా కనిపిస్తున్నాడని ఆయన అభిప్రాయపడ్డారు. క్రికెట్ కోసం దేవుడు ప్రత్యేకంగా తయారు చేసిన ఆటగాడిలా అతడు కనిపిస్తున్నాడని, అతడి సహజమైన ఆట శైలిని కొనసాగించనివ్వాలని కిరణ్ మోరె అన్నారు.